DILI, STLTIMORLESTE.com – Kazu hadau telemovel hodi rezulta Niusia Fangidai Soares Jong lakon vida no nia inan JEFS hetan kanek, iha alegasaun Prokurador husu Tribunal atu kondena arguidu ho inisial RML neebe iha momentu neeba lori motor hodi tula nia kolega JP.
Alegasaun nee halao iha loron Tersa (17/12/2024) no Prokurador prosesu Renato Bere Nahak mantein ho akuzasaun neebe iha, no konsidera arguidu komete duni krimi neebe Ministeriu Publiku akuza ba, tanba momentu neeba arguidu mak konduz motor tula nia kolega JP hodi foti telemovel iha lezada nia motor, no arguidu rasik mak konduz motor halai makaas, maski lezada hakilar iha kotuk.
MP konsidera, bazeia ba deklarasaun husi lezada nian, MP mantein ho akuzasaun neebe iha, hodi solisita ba iha Tribunal Koletivu atu koondena arguidu pena prizaun tinan 8 efetivu.
Enkuantu husi defeza arguidu nian, Defensor Publiku Manuel Amaral solita ba iha Tribunal Koletivu atu absolve arguidu husi krimi refere. Razaun mak defeza konsidera katak, faktus neebe iha la prienxe elementu esensial iha artigu 253 iha numeru ida neebe koalia kona-ba krimi Roubo.
Defeza konsidera, faktus neebe produs iha audensia neebe mai husi arguidu no lezada la hatudu katak, maneira neebe arguidu halo nee violensia la eziste iha neeba, no ofensa integridade.
Defeza deklara, arguidu lori deit motor, no arguidu nia kolega JP mak foti telemovel, defeza mos haree elementu esensial husi ameasa ho violensia la eziste iha kazu konkretu, eziste depois maibe laos arguidu mak halo no arguidu nia kolega JP mak halo, soe ai hodi kauza lezada monu halo lezada nia oan mate no lezada hetan kanek.
Tanba nee, Defeza husu Tribunal atu absolve arguidu husi krimi refere.
Arguidu nia kolega JP Tribunal mos hasai tiha ona mandadu detensaun, oras nee daudaun arguidu nia kolega JP detein ona iha sela hodi kumpri 72 horas, depois submete mai iha Tribunal ba prosesu Primeiru Interogatoriu.
Rona tiha alegasaun, Tribunal adia ba loron 03 fulan Janeiru hodi rona desizaun ikus.
Tuir akuzasaun katak, iha loron 12 fulan Maiu tinan 2024, pur volta 19h00 kalan, ofendida JEFS fila husi treinu basket iha Eskola Xina hodi ba foti nia oan vitima Niusia Fangidai Soares Jong iha Kuluhun atu fila ba iha sira nia hela fatin Pantai Kelapa Dili.
Ofendida kondus motorizada marka Meo Beat, matrikula 05299 husi diresaun Kuluhun atu ba iha Pantai Kelapa Dili, too iha Kampun Alor, arguidu RML tula nia kolega JP neebe kaer ai tonka kondus motorizada marka Meo Beat tuir husi kotuk.
Arguidu konduz motorizada besik ba iha ofendida hodi liu husi sorin karuk, hodi arguidu JP foti telemovel marka Oppo husi nia tilun parte karuk hodi kontinua halai liu.
Ofendida tenta duni tuir arguida ho nia kolega JP, maibe arguidu JP lori ai tonka tuda ba ofendida nia motorizada hodi nia mos lakon kontrola soke trotoat monu ba rai vitima hetan kanek todan no nia oan liu loron rua mate iha hospital.
Konsekuensia husi arguidu sira nia asaun nee, halo vitima Nusia mate no vitima Juliana hetan kanek grave.
Arguidu sira hatene katak, bainhira hadau ema nia telemovel no halo violensia nee kontra ema nia vontade, maibe arguidu sira halo nafatin saida mak sira hakarak.
Arguidu halo krimi ho livre, deliberada konsentemente no hatene katak hahalok nee proebidu no hetan pena tuir lei.
Tanba nee, konsidera arguidu hanesan Ko Autor material ba krimi Roubu neebe previstu iha artigu 253 husi Kodigu Penal.
Hatan ba akuzasaun neebe iha, arguidu RML konfesa ba faktus, arguidu deklara katak, momentu neeba arguidu ho nia kolega ho motor husi Diresaun Tasi ibun atu ba iha Kristu Rei, maibe too iha dalan klaran arguidu sira iha tarjetu hanoin atu foti sasan, tanba nee arguidu sira konduz motor hodi fila fali, too iha Diresaun Kampu Alor nian arguidu sira haree ofendida ho motor, arguidu sira mos konduz motor tuir ofendida husi kotuk hodi foti telemovel.
Arguidu deklara, kona-ba ofendida ho nia oan monu ho motor, arguidu sira la haree ona tanba arguidu sira halai liu.
Ofendida mos konfesa ba faktus katak, momentu neeba ofendida konduz hela motor, depois arguidu sira foti tiha ofendida nia telemovel, ofendida tenta duni tuir hodi hakilar maibe la iha ema ida rona hodi ajuda, too iha Loja Seara tasi ibun, ofendida lakon kontrola hodi soke ba iha trotoar.
Rona tiha arguidu no ofendida, Tribunal mos hasai kedan notifikasaun ba iha arguidu JP neeba hamutuk ho arguidu.
Audensia julgamentu nee, prezide husi Juiz Koletivu, Zulmira Auxiliadora, Ivan Surita, Arjentino Nunes, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku Manuel Amaral.
(ter)
