BAUKAU, STLTIMORLESTE.com – Relasiona kazu hana joven nain 5 iha area Star Motor, Postu Administrativu Baukau Vila, ho rama ambom no asaltu malu iha area Mulia Uaiaka rezulta uma 4 rahun, tanba tuda, veteranu Fernando “Beredu’u” Gusmão deskonfia iha motivu politiku.
Veteranu Fernando Beredu’u Gusmão hateten, asuntu seguransa iha Munisipiu Baukau too iha fulan Agostu tinan nee lao hakmatek, tanba laiha asaun neebe akontese fo ameasa ba ema nia vida, maibe inisiu fulan Setembru tinan nee hahu akontese ema deskonhesidu hana jovem sira iha area Star Motor ho rama ambon aliende mos iha iha loron 29 Setembru parte kalan mosu asaltu malu iha area Mulia Uaiaka rezulta uma komunidade balu hetan estragus tanba tuda husi jovem sira.
“Fulan ida nee nia kotuk ba iha Buakau problema laiha maibe agora problema mosu ona, nee politika laos labarik sira mak hakarak halo ida nee, politika mak hakarak halo ida nee dala ruma atu balas iha Dili nee mak hanesan nee, neebe seguransa tenke patrolha,” hateten”Beredu’u” iha Vila Antiga, Baukau, Tersa (30/09/2025).
Tuir vetetanu tinan 24 nee katak, antes situasaun iha Baukau lao hakmatek, maibe hafoin mosu manifestasaun iha Dili hahu, iha Munisipiu Baukau mos hahu asaun hirak hana jovem sira ho Rama Ambon no asaltu malu.
Nunee hanesan veternau nia husu Komando Polisia Baukau atu halo patrolhamentu iha tempu kalan no wainhira hetan jovem sira tuur iha luron haruka fila uma, tanba liu husi patrolhamentu mak bele prevene kazu sira neebe involve husi ema deskonhesidu.
“Polisia tenke patrolhu makaas hetan karik kaer husu nia hanoin nia hakarak nee oinsa, sira mak hakarak halo ga politika ruma mak haruka sira,” Beredu’u sujere.
Veteranu nee sente triste iha faze ukun aan tuir lo-loos jovem sira prepara aan liu husi aprende no kapasitasaun hodi kontribui iha prosesu dezenvolvimentu, maibe foti inisiativa kria asaun hirak nee, deskonfia influensia husi politika balun estraga estabilidade.
Tanba nee husu Komando Polisia Munisipiu Baukau kontinua patrolhamentu rutina ho kapasidade seguransa nian nunee bele identidifika autor ba kazu hirak neebe akontese submete ba prosesu identifikasaun.
Liga asuntu nee jornalista STL seidauk hetan komentariu husi Komadante Komando Polisia Munisipiu Baukau, tanba tuir hela atividade importante balu iha fatin seluk.
Jornalista: Tomas Reis
Editora: Carme Ximenes
