DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu Primeiru Interogatoriu, deside hodi aplika medida Aprezentasaun Periodika (AP) ba iha arguidu nain rua (2), neebe deskonfia envolve iha kazu neebe akontese iha Hera.
Arguidu nain rua ho inisial, SMF no BA submete mai iha Tribunal no Ministeriu Publiku promove ho krime Arma Branka, no mos Ofensa Integridade Fisika Simples.
Hafoin depaisu husi Juiz Turnu, Defeza arguidu sira nian deklara katak, aseita ho despaisu neebe Tribunal fo sai.
“Tribunal liu husi despaisu ikus, deside hodi aplika medida Aprezentasaun Periodika ba arguidu nain rua, atu aprezenta an iha postu Polisia neebe hela besik ba kada fulan ida dala ida,” dehan Defeza arguidu sira nian ba STL, iha Tribunal, Dili, Kuarta (17/09/2025).
Nia hatutan, iha alegasaun Prokuradora husu atu Tribunal aplika medida Aprezentasaun Periodika ba arguidu, tanba nee defeza mos aseita ho medida nee. No ikus mai Tribunal deside no aplika medida AP ba arguidu.
Prosesu primeiru Interogatoriu nee, prezide husi Juiza turnu Fransisca Cabral, Ministeriu Publiku reprezenta husi Prokuradora Bemvinda do Rozario, arguidu hetan asistensia legal husi Defensor Publiku Manuel Exposto.
Tuir kronolojia katak, iha loron (15/09/2025) Komando PNTL Munisipiu Dili liu husi Seksaun Rezerva Intervensaun Rapida (RIR), Ekipa Alfha simu informasaun husi Delta base katak, akontese problema asaltu malu iha Area Akanunu, Hera ho Ida nee Seksaun Rezerva Intervensaun Rapida (RIR), fo apoiu ba Patrullamentu Eskuadra Kristu Rei ba kedas iha fatin akontesementu no konsege Kaptura Joven nain rua hamutuk ho evidensia Tudik rua inklui motorizadas Tolu (3).
Iha akontesimentu nee rezulta vitima ida ho naran inisial AS hetan kanek iha parte hirus matan, tamba hetan sona no agora dadauk vitima nee iha hela hospital hodi halo Tratamentu.
Jornalista: Terezinha De Deus
Editora: Carme Ximenes
