DILI, STLTIMORLESTE.com – Tribunal Judisial Primeira Instansia Dili liu husi despaisu ba prosesu primeiru interogatoriu, desidi aplika medida Termu Indentidade Rezidensia (TIR) ba arguidu nain rua ho inisial DV no JS ba kazu Hudi Laran.
Arguidu nain rua, lori mai iha Tribunal no Ministeriu Publiku (MP), promove sira nain rua ho Krime Danu ho Violensia.
Juiz turnu halo tiha indentifikasaun ba arguidu nain rua, no ikus mai deside hodi aplika medida TIR ba arguidu nain rua. No tuir defeza arguidu nain rua nian, Eustaquio Guterres katak, Tribunal kontinua mantein ho medida TIR.
“Tribunal nia despaisu maka hanesan aplika medida kuasaun neebe adekuadu maka Tribunal mantein Termu Indentidade Rezidensia (TIR), mesmu Ministeriu Publiku husu atu aplika medida Aprezentasaun Periodika maibe Tribunal matein TIR, “dehan Eustquio ba jornalista sira, iha Tribunal, Dili, Kuarta (15/10/2025).
Tuir Eustaquio, defeza haree no aprezenta ho razaun neebe iha, tanba nee ikus mai defeza aseita no aplika medida neebe adekuadu maka TIR, ba arguidu nain rua.
Maibe kona-ba akontesementu iha Hudi Laran momentu neeba arguidu nain rua ho kondisaun lanu, hemu tua iha restorante nee no to ikus arguidu nain ida lanu todan liu, koalia ho ema sira neebe iha restorante nee ho diskusaun ruma, la aseita malu hodi mosu problema.
No arguidu sira rekonhese baku duni sasan balu rahun, maibe vitima sira mos ba hotu iha Tribunal, tanba nee sira fila sei rezolve familia. No Ministeriu Publiku (MP) promove krime rua, maibe sei investiga didiak lai maka foin hatene.
Hanesan Defeza ba iha prosesu nee konkorda ho despaisu neebe Tribunal hasai, tanba nee sei la halo rekursu hasoru despaisu Tribunal nian.
Prosesu Primeiru Interogatoriu nee, prezide husu Juiz turnu Jumiati Freitas, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku, Eustaquio Guterres.
Arguidu sira lori mai iha Tribunal, hatais ropa detidu no lori husi autoridade seguransa. Tribunal desidi tiha, pasa mandadu hodi liberta kedan arguidu nain rua.
Jornalista: Terezinha De Deus
Editora: Carme Ximenes
