DILI, STLTIMORLESTE.com – Jogu online nee taka ona husi Governu, maibe kazu nee loke rasik husi Governu, no oras nee iha ona prosesu nia laran.
Kestaun nee hatoo husi Visi Diretor HAK, Antonino de limas ba STL iha Farol, Kinta (09/10/2025).
Nia hatete, relasiona ho kazu jogu online nee oras nee Governu taka ona, no prosesu iha investigasaun nia laran, karik iha prosesu investigasaun mak identifika katak inklina mos membru Governu ruma fasilita presiza kumpri, tanba lei ba ema hotu.
Kazu jogu online iha ona invetigasaun, depois informasaun terbongkar no Governu rasik mos foti ona desizaun hodi hapara jogu online.
“Ita nia perguntas ba investiga, hau hanoin nafatin atu cek proposta uluk nee lao oinsa prosesu too Primeiru Ministru autoriza fo lisensa ba bisnis nee oinsa karik. Iha investigasaun kazu nee mak hatudu indikasaun ruma bele mos investiga, tanba kait molok too dokumentus lisensa nee sai sempre iha komunikasaun kordenasaun depende ba invetigasaun neebe polisia halo ho kompanha neebe fulan ida liu ba governu hapara,” dehan nia.
Nia hatete, oras nee investigasaun lao hela ba sira neebe mak komete regra ruma, no Konsellu Ministru mos hasai ona desizaun hapara bisnis hotu hotu liga ho online nee, karik iha investigasaun mak iha indikasaun ruma bele kondena mos.
Nunee mos Peskizador Asia Justisa and Rights Inocencio de Jesus Xavier hatete, kansela jogu online nee buat diak ida neebe oras nee Governu halo dadaun bele antisipa hodi halo prevensaun kontra kriminozu sira husi krime organizado sira.
“Triste oituan kuandu ita nia rai ita nia Governante sira ema balun fasilita atu fo lisensa jogu online nee lao tiha ona depois halo tiha atividade sira neebe kontra Sistema lei sira, ita latoo deit prosesu rezolusaun suspensaun, maibe loke prosesu ba ema sira neebe fasilita ema sira neebe lisensa, ema sira neebe sai mata dalan no sai garantor ba jogu sira sira nee tenke loke prosesu investigasaun se iha grave sira tenke ba komarka hodi responsabliza ba sira nia aktu,” katak nia.
Nia hatete, presiza loke prosesu ba ema neebe fasilita no fo lisensa hodi responsabliza ba sira nia aktu, tanba Timor Leste laos fatin ba kriminozu, maibe Timor Leste tenke sai fatin hakmatek no pas, nunee bele fo konfiansa ba ema estranjeiru sira atu mai investe.
Jornalista: Emerenciana Pinto
Editor: Domingas Gomes
