DILI, STLTIMORLESTE.com – Portavos Komando Polisia Nasional Timor Leste (PNTL), Superintendente Polísia João Belo dos Reis hatete, rezultadu investigasaun kazu Kailaku submete ona ba Ministeriu Publiku (PM) hodi halo prosesu tuir mai.
“Atu hatoo ba publiku katak, investigasaun halo ona, ekipa investigasaun retira husi parte neebe fila fali mai Dili, rezultadu investigasaun aprezenta ona ba Ministeriu Publiku (MP) ho NUC-rua, ida kona-ba ema mate no ida seluk kona-ba perturbasaun orden publiku,” hatete Portavos Komando PNTL, Superintendente Polísia João Belo dos Reis ba jornalista sira hafoin remata serimonia aniversariu UPM ba dala-23 iha resintu UPM Largo Lesidere, Tersa nee (27/05/2025).
Nia tenik, rezultadu investigasaun neebe submete ba MP nee ho NUC-0149-PNSIK kona-ba Perturba Ordem Públika no NUC-0150 PNSIK kona-ba kazu hamate joven ida ho naran Ronaldinho Mota Ximenes (23) iha Kailaku.
“Suspeitu hamutuk 12 mak ita identifika, husi nain 12 nee iha investigasaun klean mak balun bele hanesan suspeitu, balun bele mos hanesan vitima no testemunha,” esplika nia.
Nia informa, iha akontesimentu neebe akontese iha loron 20 fulan Maiu iha serimonia isar bandeira ba selebrasaun Restaurasaun Independensia ba dala-23 iha Postu Kailaku nee liu husi konfrontu nee rezulta sidadaun ida lakon vida, no uma balun hetan estragus inklui motor no karreta balun.
“Ida nee segredu justisa, hau labele fo sai iha nee, aban bainrua sei aprezenta ba Ministeriu Publiku, depois hatutan ba Tribunál mak ita bele akompanha,” nia deklara.
Entretantu situasaun daudaun nee iha Postu Administrativu Kailaku, Munisípiu Bobonaro nee lao ho kontroladu, tanba hetan orientasaun husi Komando PNTL hodi destaka Membru Unidade Espesial Polísia (UEP) hodi asegura situasaun iha terenu.
(jen)
