DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba kazu kombustivel PNTL, hodi kontinua rona sasin.
Prosesu refere antes nee Tribunal rona ona deklarasaun husi arguidu sira, tanba nee iha julgamentu kontinuasaun nee, Tribunal deside hodi rona deklarasaun husi sasin.
Iha sala julagementu laran sasin Agusto Tola deklara katak, momentu neeba servisu hanesan Lojistika iha PNTL Oekusi, no rekonhese momentu neeba sasin mak halo pedidu mai iha nasional hodi husu kombustivel 4 mil litru atu suporta Komando nia servisu.
Sasin deklara, mina refere too iha Oekusi, iha 2 mil litru mak lori ba entrega iha sasin hodi ense ba tanki hodi apoiu servisu iha Komando, maibe 2 mil la ba iha Komando tanba dehan ordem, uza ba iha natal konjuntu, se mak fo ordem sasin la iha konhesimentu kona-ba ida nee.
Sasin deklara tan, iha ema nain tolu mak lori mina 2 mil litru ba entrega iha sasin, maibe la iha kupon, no la iha termu entrega, no tuir informasaun mina 2 mil litru neebe uza ba natal konjuntu uza ba kareta privadu, sasin la iha konhesimentu, no sasin rasik la partisipa iha natal konjuntu nee.
No mina neebe sira ense, antes lori ba ense iha tanki hodi apoiu servisu Komando nian, sira ense uluk tiha 2 mil litru ba iha natal konjuntu nian, mak foin lori Komando nian ba ense.
Rona tiha sasin nee, Tribunal adia ba loron seluk hodi rona sasin sira seluk.
Tuir akuzasaun neebe iha katak, Sekretaria Estadu Siguransa aprejenta relatoriu audit halao husi Gabinete Inspesaun no Auditoria kona-ba dividas PNTL ba iha Kompanhia TOLL Timor Leste ligadu ho abastamentu kombustivel iha fulan Fevereiru nomos Marsu tinan 2013, akontese iha Lojistika Nasional.
Aprovisionamentu PNTL reprezenta husi JC nuudar Diretor Aprovijionamentu asina kontratu ho Kompanhia TOLL Timor Leste repezenta husi Ian Stewart hodi fornese kombustivel hahu husi loron 01 Janeiru 2013 to loron 31 Marsu 2013.
Rezultadu inspesaun refere detekta abastamentu kombustivel ba iha fulan Fevereiru tinan 2013, ba iha kareta tanku ho matrikula 02-324G, ho kapasidade 3000 litrus atesta ho total 6,720 Ltrs gazoel, tuir GIS-SES iha indikasaun naok.
Rezulta katak arguidu LLG, DM nomos arguidu BBJ servisu hamutuk hodi hasai mina husi kompanhia TOLL Timor Leste no atesta oituan deit iha tanki mina PNTL no mina barak mak arguidu sira faan no osan sira fahe ba malu.
Arguidu LLG aproveita situasaun hodi benefisia nia aan nomos ema seluk nian, halao mos nia atividade naok mina no faan.
Total kombustivel fornese husi Kompanhia TOLL Timor Leste periodu Fevereiru 2013 ho total 6,720 ltrs gazoel ho total osan US$ 9, 818,07, arguidu LLG lori ba fan no osan nia fahe ba arguidu DM nomos arguidu BBJ.
Inidisia katak kombustivel fornese husi TOL kapasidade 6,613 ltrs ho osan US$ 8,336.60 atesta iha fulan Marsu 2013 arguidu LLG tula balu ba faan nomos balu ense balu ba iha tenki sira.
Arguidu BBJ nuudar Xefe Lojistika iha poder administra bens pertense ba PNTL, maibe aporveita poder neebe nia iha hamutuk ho arguidu DM nuudar responsavel ba mina no arguidu LLG nuudar ema neebe mak hetan poder husi arguidu nain rua seluk hodi foti mina iha Kompanhia TOLL hodi ba ense iha tanki mina uza sira nia kompetensia.
Arguidu sira halo ida nee ho livre, deliberada hatene katak sira nia hahalok nee kontra lei no bele hetan kastigu mesmu hanesan nee arguidu sira kontinua halo hodi hetan ba sira benefisiu nomos prejudika Estadu RDTL.
Konsekuesnia Estadu RDTL sofre prejuizu husi arguidu sira nia hahalok ho montante gazoel ho total (fevereiru US$ 9, 818,07 nomos marsu US$ 8,336.90) US$ 18, 154.97 (rihun sanulu resin walu dolar atus ida limanulu resin hat sentavu sia nulu resin hitu).
Arguidu BBJ hanesan autor matrial, Krime Pekulatu art. 295° KP ho forma kontinuadu nomos. Krime trafiku de influensia tuir artigu 192 Kodigu Penal.
Arguidu LLG hanesan autor matrial, krime Pekulatu artigu 295 KP ho forma kontinuadu.
Arguidu DM hanesan autor matrial, ba pratika krime Pekulatu artigu 295 Kodigu Penal ho forma kontinuadu.
Audensia julgamentu nee, prezide husi Juiz Koletivu, Ana Paula, Ersilia de Jesus, Jose Maria, Ministeriu Publiku reprezenta husi Prokuradora Lidea Soares, arguidu hetan asistensia legal husi Defensora Publika Joana Cristina, no Advogadu Privadu, Arlindo Sanches.
(ter)
