DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba kazu neebe akontese iha Kuluhun de Baixo, hodi rezulta lezadu neebe hanesan membru Komponente Naval hetan sona kuak haat iha parte isin lolon nian.
Kazu refere Tribunal rona ona deklarasaun husi arguidu, tanba nee julgamentu kontinuasaun iha loron Tersa nee (0/4/03/2025), Tribunal rona deklarasaun husi lezadu nian.
Iha sala julgamentu laran lezadu deklara katak, momentu neeba lezadu hamutuk ho nia primu JM, ba iha bar ida neebe lokaliza iha Kuluhun de Baixo, sosa tua hodi hemu. Lezadu ho nia primu ba bolu mos ho nia primu ida hela iha Taibesi hodi mai sira nain tolu hemu, maibe nia primu neebe hela iha Taibesi fila sedu tiha.
Lezadu deklara, lezadu ho nia primu JM tur no hemu hela tua Janel Jus agua boot ida, no depois sira haree ema deskonhesidu nee sei koalia ho feto ida neebe halao servisu iha bar nee, no kontinua hakat besik kedan mai fatin neebe lezadu ho nia primu hemu tua ba.
Lezadu deklara, ema deskonhesidu nee husu tua atu hemu, no lezadu hateten ba ema nee katak, hakarak hemu tur tiha mak hemu, no lezadu koalia hanesan nee tanba ema deskonhesidu refere hamriik hela.
Nunee deskonhesidu refere la simu lezadu nia liafuan, kontinua hamriik, no lezadu nia primu JM kontinua fui tua hodi ba ema deskonhesidu refere, maibe nia kontinua la simu tua nee hodi hemu, no lezadu koalia ba nia primu katak ema la hemu labele obriga. Rona ida nee, deskonhesidu refere hatan ba lezadu katak, neebe nusa, lezadu mos hamriik hodi hatan ba ema nee katak, neebe nusa fali.
Lezadu deklara, ho liafuan lezadu nian nee halo ema deskonhesidu refere la simu, hodi hasai rama ambon neebe tau iha pasta laran sona kedan ba lezadu, sona primeiru kona iha liman loos, segundu iha kabas, terseru iha sorin karuk, no kuartu hirus matan.
Lezadu deklara, sona tiha lezadu no lezadu sente raan sai barak hodi halai, no liu tiha fatin nee mak lezadu sente oin nakukun monu tun, no banhira sadar iha ona hospital. No lezadu haree ema nee hatais faru mutin, no uza pasta metan tau iha sorin, ambon neebe uza hodi sona lezadu nia saku fulun la iha, maibe nia isin deit.
Lezadu deklara, baixa tiha hospital hodi Militar PM sira mak buka tuir ema refere hodi kaer, no ba informa ba lezadu katak, ema neebe sona lezadu sira kaer ona, hahu husi nee mak lezadu foin hatene ema nee. Durante iha hospital lezadu baixa semana ida, no kanek neebe iha hetan suku hotu.
Rona tiha lezadu, Tribunal adia ba loron seluk hodi rona deklarasaun husi sasin sira.
Tuir akuzasaun neebe iha katak, iha loron 05 fulan Marsu tinan 2022, iha oras 03h00 madrugada iha fatin akontesimentu Alldeia Kuluhun de Baixo, Suku Kuluhun, Dili.
Iha momentu neeba lezadu ho nia kolega JM ba iha fatin akontesimentu hodi sosa tua sangaria hodi hemu halimar iha fatin refere.
Nunee lezadu haree arguidu hakbesik mai lezadu nia meza hodi husu tua ba lezadu, maibe lezadu koalia ba arguidu katak, hakarak hemu tua tur tiha mak ita hemu.
Lezadu nia kolega haruka arguidu hemu, lezadu hatan katak lalika obriga ema hemu.
Arguidu la satisfaz hodi koalia tolok ba lezadu ho lia fuan mal, hodi dehan neebe nusa, lezadu mos hatan ho lian neebe nusa fali.
Ho nunee, arguidu hasai rama ambon neebe tau iha pasta laran, tara iha kakorok hodi sona direita ba lezadu nia oin.
Konsekuensia husi arguidu nia hahalok nee, halo lezadu hetan kanek iha isin lolon.
Tanba nee, Ministeriu Publiku akuza arguidu komete krimi Arma Branka, omisidiu ho Forma Tentadu iha artigu 138 Kodigu Penal.
Audensia julgamentu nee prezide husi Juiz Koletivu Jose Gonsalves, Jose Quintao, Jumiaty Freitas, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Defensor Publiku Fernando de Carvalho.
(ter)
