DILI, STLTIMORLESTE.com – Tribunal Judisial Primeira Instansia Dili iha loron Sabadu (19/07/2025) halao prosesu primeiru interogatoriu ba arguidu nain 4 ho inisial JB, AD, BD inklui ho feto ida inisial G.
Arguidu nain 4 lori mai iha Tribunal no husi parte Ministeriu Publiku nian promove sira ho krimi omisidiu agravadu neebe previstu iha artigu 139 husi Kodigu Penal.
Krimi Omisídiu Agravadu nee iha Kodigu Penal ho nia modura penal neebe deskreve iha artigu nee ho pena prizaun tinan 12 too tinan 25.
Arguidu sira lori mai Tribunal iha oras tuku 10:00 dader, depois submete kedan ba iha prosesu primeiru interogatoriu. Iha interogatoriu nee, Juiz Turnu Jose Gonsalves rona uluk deklarasaun husi arguida nian.
Depois de tama iha oras tuku 12:00 Tribunal suspende tiha, tanba tama ba iha oras almosu nian, depois de ida nee Tribunal hahu fali ho prosesu identifikasaun ba iha arguidu sira iha oras tuku 14:00.
Tuir regra normal, iha prosesu Primeiru Interogatoriu, Tribunal liu husi Juiz turnu sei halo uluk identifikasaun ba arguidu sira, depois remata sei iha alegasaun husi Ministeriu Publiku no parte defeza arguidu nian. Depois mak Juiz prosesu sei deside kona-ba medida saida mak sei aplika ba arguidu sira.
Ba prosesu ida nee sei iha hela faze identifikasaun ba arguidu sira sei lao hela.
Prosesu refere prezide husi Juiz Turnu Jose Gonsalves, Ministeriu Publiku reprezenta husi Prokurador Pedro Baptista, João Marques, arguidu sira hetan asistensia legal husi Advogadu Privadu, Ismael Asunsao no Agustinho.
Tuir kronolojia katak, iha kazu asalta no omesidiu ida akontese iha loron 14/07/2025, wainhira vitima tula nia namorada (seidauk hatene inisial) ho motor iha loron domingo lori ba iha area dolok-oan (cristo-rei) Dili.
Nunee too iha dolok-oan vitima Mario Quintão istoria malu ho nia namorada, tanba deit vitima telefone nia namorada la foti telefone, nunee sira nain rua istoria malu.
Nia hatutan, depois vitima ho nia namorada istoria malu hotu, too iha oras loraik deside fila husi dolok-oan, maibe too iha dalan klaran mai too area Lecidere vitima nia namorada haruka mensajen ba iha nia maun sira.
No nia maun sira buka tuir, maibe iha Lecidere, depois nia maun sira komesa halo asaltu ba iha vitima nomos baku vitima too grave didiak, depois lori ba iha HNGV la konsege salva vitima nia vida no hakotu iis.
(ter)
