DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial AR, tanba komete krimi omisidiu ho Forma Tentada hasoru lezadu ho inisial FP.
Tuir akuzasaun neebe Juiz Prosesu Ana Paula lee sai katak, iha loron 16 fulan Janeiru tinan 2023 iha oras tuku 9 dader iha Guisu Maubara Likisa lezadu FP ba vizita nia subrina sira fila mai hasoru arguidu iha dalan, no arguidu husu ba lezadu katak, o atu ba neebe, lezadu hatan ba arguidu dehan atu ba hili ai maran. Arguidu dehan ba lezadu katak, o bosok no arguidu kontinua foti fatuk tuda ba lezadu, no lezadu mos foti fatuk tuda ba arguidu, no arguidu kaer katana ida taa kedan ba iha lezadu nia matan fukun, ulun no kelen halo raan sai barak.
Konsekuensia husi arguidu nia aktu nee halo lezadu hetan kanek no moras.
Tanba nee Ministeriu Publiku akuza arguidu komete krimi omisidiu ho Forma Tentada.
Hatan ba akuzasaun nee arguidu deklara katak, momentu neeba arguidu iha hela sira nia uma, no lezadu mak ba halo atake iha arguidu nia uma, lori fatuk tuda arguidu, tanba nee arguidu foti katan taa lezadu.
Arguidu deklara, relasaun ho lezadu hanesan nia rian, no momentu lezadu mai nee hemu tua ho kondisaun lanu. No arguidu taa lezadu tanba lezadu hakuak metin hela arguidu book aan la diak, tanba nee mak arguidu mos ta lezadu.
Arguidu deklara, taa dala barak tanba lezadu hakuak hela arguidu metin. No lezadu husik ona arguidu mak arguidu mos halai sai, no sira la iha problema balu antes nee. Arguidu deklara tan, sira rezolve ona tuir kultura, hodi fo sala fahi no karau.
Lezadu deklara, momentu neeba lezadu ho kondisaun lanu no arguidu lori duni katana taa lezadu. Akontese problema nee tanba antes nee sira iha ona problema kona-ba fetosan umane, ho ida nee mak nervozu too ikus mai mosu problema.
Iha alegasaun, Prokurador Gustavo deklara katak, arguidu halo konfisaun ba faktus esensial neebe akuza ba nia, arguidu mos justifika kona-ba motivu saida mak arguidu taa, lezadu hakbesik ba arguidu aperta arguidu mak arguidu mos taa lezadu. Lezadu mos konfirma ba faktus neebe iha.
No MP fiar ba deklarasaun lezadu nian, husu Tribunal tetu tuir konviksaun Tribunal nian, hodi aplika desizaun ba arguidu.
Enkuantu husi defeza, Jose da Silva husu Tribunal atu absolve arguidu husi krimi nee, tanba sira iha akordu ida no rezolve ona tuir familia nian.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu Ana Paula, Ersilia de Jesus, Jose Maria, Ministeriu Publiku reprezenta husi Prokurador Gustavo arguidu hetan asistensia legal husi Defensor Publiku Jose da Silva.
(ter)
