DILI, STLTIMORLESTE.com – Tribunal Judisial Primeira Instansia Dili iha loron Domingu (20/07/2025) liu husi despaisu ikus ba prosesu Primeiru Interogatoriu, deside aplika Medida Prizaun Preventiva ba arguidu JB no Medida Aprezentasaun Periodika ba arguidu nain tolu inisial AD, BD no arguida insial L hanesan matebian Mario Quintão nia namorada.
Prokurador promove arguidu nain 4 mai iha Tribunal ho krimi omisidiu agravadu neebe previstu iha artigu 139 husi Kodigu Penal.
Krimi omisidiu agravadu nee iha Kodigu Penal ho nia modura penal neebe deskreve iha artigu nee ho pena prizaun tinan 12 to tinan 25.
Hafoin despaisu husi Tribunal nian, tuir defeza husi arguidu sira nian, Advogadu Privadu Agustinho De Jesus dehan, arguidu nain 4 nee, iha arguidu nain 1 hetan medida Prizaun Preventiva no nain 3 hetan medida Aprezentasaun Periodika.
“Ministeriu Publiku promove mai ho krimi omisidiu, depois Tribunal rekolha provas no entende iha tan Krimi Sekuestru, maibe ida nee servisu boot ida ba iha Ministeriu Publiku hodi halo investigasaun, tanba nee mak Tribunal deside aplika medida Prizaun Preventiva ba arguidu JB no aprezentasaun Periodika ba arguidu nain 3,” dehan Defeza arguidu nian.
Nia hatutan, arguidu neebe Tribunal aplika medida Prizaun Preventiva tanba konsidera iha indisus ba krimi neebe Ministeriu Publiku promove nee, tanba nee mak Tribunal entende asegura arguidu nee ba iha Prizaun Preventiva hodi hein prosesu investigasaun.
Esplika tan, Aprezentasaun Periodika ba arguidu nain tolu nee atu aprezenta an iha Postu Polisia neebe hela besik ba, fulan ida dala rua hahu husi loron 1 fulan Agusto.
Sublina, kona-ba arguidu neebe hetan medida Prizaun Preventiva hanesan defeza la konkorda, tanba nee sei halo rekursu kona-ba medida nee.
Tuir defeza, atu aplika medida ba arguidu sira tenke haree prienxe ba iha elementu subjetivu no objetivu ka lae, tanba nee arguidu sira neebe hetan medida Aprezentasaun Periodika la prense ba elementu refere.
Antes nee iha alegasaun, Prokurador Pedro Baptista no Joao Marques solisita ba iha Juiz Turnu atu aplika medida Prizaun Preventiva ba arguidu nain 4.
Enkuantu defeza neebe reprezenta husi Advogadu Privadu, Ismael Asunsao no Agustinho de Jesus husu Tribunal atu aplika medida Aprezentasaun Periodika ba arguidu nain 3 inklui matebian nia namorada.
Prosesu refere prezide husi Juiz Turnu Jose Gonsalves, Ministeriu Publiku reprezenta husi Prokurador Pedro Baptista, Joao Marques, arguidu sira hetan asistensia legal husi Advogadu Privadu, Ismael Asunsao no Agustinho de Jesus.
Tuir kronolojia katak, iha loron (14/07/2025) wainhira vitima tula nia namorada ho motor iha loron Domingu lori ba iha area Dolok-oan (Kristu Rei) Dili.
Nunee too iha dolok-oan vitima Mario Quintão istoria malu ho nia namorada, tanba deit vitima telefone nia namorada la foti telefone, nunee sira nain rua istoria malu.
Depois vitima ho nia namorada istoria malu hotu, too iha oras lokraik deside fila hosi Dolok oan, maibe too iha dalan klaran, mai too area Lecidere vitima nia namorada haruka mensagem ba iha nia maun sira.
No nia maun sira buka tuir iha lecidere, depois nia maun sira komesa halo asaltu ba iha vitima nomos baku vitima too grave, depois lori ba iha HNGV la konsege salva vitima nia vida no hakotu iis.
Tuir observasaun STL nian, arguidu nain haat lori mai iha Tribunal iha loron Sabado 19/07/2025 Tribunak halo tiha indentifikasaun no tama kedan ba iha faze alegasaun. No iha loron 20/07/2025 Juiz prosesu foin deside kona-ba medida sira neebe aplika ba arguidu nain 4.
(ter)
