DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba kazu Jose Bernardo mate iha sela Kaikoli.
Iha sala julgamentu laran Juiz kontinua rona sasin Fortonato Savio Guterres, hanesan membru PNTL.
Iha sala julgamentu laran sasin deklara katak, iha tinan sasin halao knaar hanesan ekipa patrulhamentu Eskuadra Vera Cruz. Momentu neeba sasin sira simu keixa husi sidadaun neebe baixa hela iha hospital, tanba nee sasin hamutuk ho nia kolega sira inklui investigador ida hamutuk ho sidadaun neebe baixa hela iha hospital nia bin, hodi ba foti matebian iha nia uma.
Sasin deklara, banhira lori matebian too iha Vera Cruz, sasin hamutuk ho sira nia ekipa entrega kedan matebian hamutuk ho nia kolega ida ba iha investigador sira, no sasin sira kontinua ba halao servisu patrulhamentu.
Sasin deklara tan, momentu neeba sasin la ba iha hospital hodi haree Gaudensiu neebe baixa hela, no sasin sira ba foti matebian iha sira nia uma, situasaun iha matebian sira nia uma lao normal hela.
Sasin deklara, sira ba foti matebian iha nia uma, bazeia ba orientasaun husi Komandante, maibe orientasaun verbal, hodi mai halo indentifikasaun.
Prokurador husu kona-ba regra atu halo identifikasaun ba ema ruma, bele iha kualker fatin deit ka oinsa, sasin deklara atu halo identifikasaun ba ema ruma tenke bazeia ba iha situasaun.
Rona tiha sasin hotu, Juiz prosesu Jose Escurial deklara katak, sasin ida neebe rona hanesan sasin ikus ona ba iha prosesu nee, tanba nee Tribunal deside kedan loron 1 fulan Julhu, oras tuku 11 dader, hodi tama ba iha faze alegasaun husi Ministeriu Publiku no Defensor Publiku nian.
Tuir akuzasaun neebe mai husi Ministeriu Publiku katak, iha loron 31 fulan Setembru tinan 2022, arguidu AAM nuudar investigador iha Eskudara PNTL Vera Cruz, simu informasaun husi denunsiante Verdiana da Silva, neebe mak informa katak nia alin ho naran Gaudencio Felipe da Silva hetan baku iha loron 01 fulan Setembru tinan 2022 haleu tuku 04H00 madrugada, iha aldeia 01, Suku Kaikoli, Postu Administravu Vera Cruz, Munisipiu Dili, agora daudaun denunsiante nia alin nee baixa hela iha Hospital Nasional Guidu Valdadares.
Hafoin simu tiha informasaun referidu, arguidu AAM ho arguidu TCPE dezloka kedan ba Hospital Nasional Guido Valadares ho objetivu atu rekolha informasaun husi Gaudencio Felipe da Silva, maibe arguidu sira la konsege foti informasaun husi Gaudencio tanba iha hela sala operasaun.
Bainhira fila husi Hospitál Nasional Guido Valadares, arguidu AAM kontinua rekolha informasaun husi Sra. Verdiana da Silva no husi informasaun sira nee identifika katak, vitima Jose Bernardo de Jesus Soares ho nia kolega sira mak halo agresaun fiziku hasoru Gaudencio Felipe da Silva.
Ho nune arguidu AAM hamutuk ho arguidu TCPE inklui membru PNTL balu tan dezloka imediatu ba iha Aldeia 01, Suku Kaikoli, Postu Administrativu Vera Cruz, Munisipiu Dili, hodi halo detensaun ba vitima Jose Bernardo de Jesus Soares ho nia kolega nain 2 ho naran Paulo Mendonça ho Osorio da Costa Carvalho.
Arguidu sira AAM ho arguidu TCPE halo detensaun ba vvitima Jose Bernardo de Jesus Soares ho nia kolega Paulo Mendonça Osorio da Costa Carvalho, ho objetivu hodi lori ba halo identifikasaun iha iha oras 12 (sanulu resin rua) nia laran iha Eskuadra PNTL postu Administrativu Vera Cruz nian.
Hafoin halao tiha identifikasaun iha oras 12 nia laran, arguidu sira liberta tiha vitima nia kolega Paulo Mendonça ho Osorio da Costa Carvalho, no vitima Jose Bernardo de Jesus Soares kontinua asegura iha Eskuadra PNTL.
Tanba Eskuadra PNTL Munisipiu Vera Cruz la eziste sela detensaun, ho nunee arguidu AAM fo orientasaun ba arguidu ACPE lori vitima ba hatama iha sela detensaun Komando Munisipiu Dili.
Arguidu ACPE lori vitima ba iha Komando PNTL Munisipiu Dili akompanha husi vitima nia inan no too iha Edefisiu Komando nian, arguidu ACPE entrega imediata vitima ba arguidu TV hodi hatama ba sela detensaun laran sein konfirma ba Komandate Investigasaun Munisipiu Dili, Mariano Soares nudar nia Superior.
Durante iha sela detensaun nia laran arguidu TV mak tau matan ba vitima, no la autoriza familia sira husi vitima nian atu haree vitima.
Bainhira vitima nia bin tenta atu hakbesik ba iha vitima atu koalia, arguidu TV hakilar ho lian makaas nee laos imi nia uma ka merkadu.
Arguidu sira halo detensaun ba vitima ho nia kolega nain 2 ho objetivu atu halo identifikasaun iha oras 12 nia laran, maibe saida mak akontese halo tiha identifikasaun arguidu sira deside lori vitima ba hatama iha sela detensaun sem justifikasaun ruma.
Depois ida nee iha loron 01/09/2022 iha oras 06:30 akontese vitima Jose Bernardo de Jesus Soares mate iha sela detensaun Komando PNTL Munisipiu Dili.
Tanba nee, MP akuza arguidu nain tolu hanesan ko-autora material ho forma konsumada pratika krimi Sekuestru neebe previstu iha artigu 160 husi Kodigu Penal.
Audensia julgamentu nee prezide husi Juiz Prezidente Jose Escurial no Juiz adjuntu Fransisca Cabral no Afonso Carmona, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Eustaquio Guterres no Juvinal Dias.
(ter)
