DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba kazu Jose Bernardo mate iha sela Kaikoli.
Prosesu refere antes nee Tribunal rona ona deklarasaun arguidu no sasin balu, tanba nee iha julgamentu kontinuasaun nee Tribunal rona sasin Mariano Soares, neebe hanesan Xefi Seksaun Investigasaun Komando Munisipiu Dili.
Iha sala julgamentu laran sasin deklara katak, kona-ba Jose Bernardo mate iha sela momentu neeba hahu husi Inisiu ekipa ba foti Jose iha nia uma, halo investigasaun no lori detidu ba tau iha sela, la informa ba sasin. Maibe sasin nia hatene, tuir regra neebe iha foti ema ida atu halo investigasaun tenke informa ba sasin, no atu detein ema ida iha sela mos tenke informa ba sasin, atu sasin bele hatene ema nee nia kazu grave ka normal, hodi halo auto notisia ba iha Ministeriu Publiku. Maibe ba kazu konkretu, parte investigasaun la informa ba sasin, banhira lori detidu ba detein iha sela.
Sasin deklara, kona-ba Jose nia mate, momentu neeba sasin hatene banhira simu kontaktu husi Komando Munisipiu Dili, tanba nee sasin mos ba kedan iha fatin akontesimentu. No sasin hamriik ho distansia neebe dook oituan, no haree detidu mate iha sala koredor nian. Sasin esplika, iha sala atu tau ema sira neebe halo krimi iha rua, sira neebe ba krimi ladun grave bele tau iha sala koredor, no nia bele movimentu ba mai maibe labele sai mai liur, sira neebe ho kazu grave tama iha sela laran, maibe sita sira nia sasan hotu no hatais ropa detidu nian.
Sasin deklara, sira neebe iha sala koredor kontinua hein husi membru PNTL neebe delega ba, ida nee laos atu limita sira nia direitu hodi labele movimentu ba mai, mai tuir regra PNTL membru ida tenke hein iha fatin nee.
Sasin deklara tan, sira iha sistema jestaun insidente neebe keixa nia numeru rejista iha neeba, maibe momentu neeba sasin iha konhesimentu deit kona-ba Gaudensio nian mak rejista iha sistema, Jose Bernardo nian la rejista iha sistema.
Tribunal konfirma kona-ba kondisaun sela detensaun nian, sasin deklara katak kondisaun sela detensaun bele dehan ladun diak, mas depois de akontese tiha Jose Bernardo nia mate, kondisaun diferensa ona hanesan uluk.
Aleinde nee sasin Paulo Mendonsa deklara katak, momentu neeba sasin haree Jose Bernardo no Gaudensio iha problema, tanba nee mak ikus mai Gaudensio baixa tiha iha HNGV.
Sasin deklara, momentu neeba Polisia mai foti hotu sasin hodi lori ba halo indentifikasaun, depois remata mak haruka sasin fila, no Jose Bernardo kontinua iha neeba.
Sasin mos rekonhese, momentu neeba sasin ba haree Gaudensio iha Hospital, maibe Gaudensio ho kondisaun grave. No tuir sasin Gaudensio no Jose Bernardo iha diferensa grupu, Gaudensio no sasin sira husi grupu ketak no Jose Bernardo husi grupu ketak.
Rona tiha sasin sira nee, Tribunal adia ba loron seluk hodi rona sasin ida, depois tama ba iha faze alegasaun.
Audensia julgamentu nee prezide husi Juiz Prezidente Jose Escurial no Juiz adjuntu nain rua, Fransisca Cabral no Afonso Carmona, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Eustaquio Guterres no Juvinal Dias.
(ter)
