DILI, STLTIMORLESTE.com – Tribunal Judisial Primeira Instansia Dili liu husi leitura akordaun, deside hodi absolve arguidu nain 3 hanesan membru Polisia Nasional Timor Leste (PNTL) inisial AAM, TCPE no TV husi krimi neebe Ministeriu Publiku akuza.
Iha sala julgamentu laran Juiz Prosesu Jose Escurial deklara katak, depois de rona tiha arguidu nain 3 no sasin sira, Tribunal fundamenta iha faktus balu provadu no mos la provadu.
Tribunal konsidera faktus provadus mak arguidu nain 3 hanesan membru PNTL no momentu neeba arguidu sira simu keixa husi denunsiantes, ikus mai arguidu sira bolu vitima hodi halo identifikasaun no arguidu AAM entrega vitima ba iha arguidu TCPE hodi lori ba entrega iha arguidu TV hodi asegura iha koredor sela detensaun.
Tribunal konsidera iha mos faktus la provadu hanesan, arguidu nain 3 hatama vitima ba sela detensaun.
No Tribunal mos konsidera la provadu la iha detensaun ilegal no Tribunal konsidera arguidu sira la pratika krimi Sukuestru tuir akuzasaun Ministeriu Publiku nian.
Tribunal konsidera katak vitima laos tau iha sela detensaun hodi privatiza nia liberdade, maibe tau iha koridor sela detensau no Tribunal konsidera katak arguidu sira halao nia knaar tuir kompetensia neebe iha tuir artigu 52 no 53 husi Kodigu Prosesu Penal.
Tribunal konklui katak arguidu sira la iha intensaun ba pratika krimi Sukestru no la halo detensaun ilegal, tanba nee Tribunal julga la provadu ba krimi sukestru.
Ikus mai Juiz Koletivu deside julga unanimidade improsidente no la provadu ba akuzasaun Ministeriu Publiku nian hodi absolve arguidu nain 3 husi krimi neebe Ministeriu Publiku akuza ba.
No la kondena arguidu nain 3 atu selu taxa Judisial, tanba hetan asistensia husi Defensor Publiku.
Hafoin desizaun Tribunal nian sai, asistente Olivio Barros deklara, sira nia parte haree katak desizaun Tribunal nian la justu. Tanba nee sira sei hamutuk ho Prokurador ba prosesu hodi halo rekursu.
“Ami sei hamutuk ho Prokurador ba prosesu hodi haree no ami sei halo rekursu,” dehan nia.
Antes nee iha alegasaun Prokurador Aderito Tilman deklara katak, faktus neebe konsta iha akuzasaun provadu hotu, provadu arguidu sira foti vitima hodi halo identifikasaun no ikus mai hodi detein.
Provadu mos katak, vitima mate iha sela no momentu neeba arguidu TV mak toma kontrola ba iha sela detensaun.
Provadu matebian hetan detensaun fora husi fragarante delito. Provadu mos arguidu TV limita vitima nia liberdade.hodi la autoriza vitima nia inan koalia ho vitima.
Tanba nee Ministeriu Publiku konsidera katak, faktus neebe konsta iha akuzasaun provadu hotu, hodi solisita ba iha Tribunal Koletivu atu kondena arguidu nain 3 ho pena prizaun tinan 5.
Aleinde nee Defeza Eustaquio Guterres deklara katak, arguidu sira halao knaar bazeia ba artigu 52 no 53 husi numeru 4 husi kodigu prosesu penal, fo biban ba iha PNTL atu halao nia servisu, kualker aktu neebe konsidera krimi, fo kompetensia ba PNTL hodi halo identifikasaun.
No defeza konsidera arguidu sira detein vitima, tanba momentu neeba vitima nia kolega neebe antes nee vitima baku, nia mos baixa hela iha HNGV no detein nian atu prevene problema labele mosu tan iha liur.
No defeza konsidera la prienxe ba krimi Sukestru neebe MP akuza, tanba arguidu sira bolu vitima atu halo identifikasaun bazeia ba ordem husi Komando.
No defeza konsidera la iha provas sufisiente atu kondena arguidu sira, tanba nee solisita ba iha Tribunal Koletivu atu absolve arguidu sira.
Enkuantu Defeza Henrique Mariz, Juvinal Dias konsidera mos katak, arguidu sira halao servisu bazeia ba ordem, tanba nee konsidera katak la provadu arguidu sira komete krimi neebe MP akuza ba, tanba nee solisita ba iha Tribunal Koletivu atu absolve arguidu nain 3.
Audensia julgamentu nee prezide husi Juiz Prezidente Jose Escurial, no Juiz adjuntu nain rua, Fransisca Cabral no Afonso Carmona, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Eustaquio Guterres no Juvinal Dias.
(ter)
