DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba kazu Jose Bernardo neebe mate iha sela Kaikoli.
Prosesu refere antes nee Tribunal rona ona deklarasaun husi arguidu nain tolu no sasin balu, iha julgamentu kontinuasaun nee Tribunal mos kontinua rona deklarasaun husi sasin nain rua.
Iha sala julgamentu laran sasin NdC deklara katak, sasin hanesan mos membru Polisia Nasional Timor Leste (PNTL), liga ba kazu matebian José Bernando tara aan iha sela nee sasin laiha konhesimentu, tanba sasin halao servisu iha Administrasaun Komando PNTL Munisipiu Dili nian.
Sasin deklara, kona-ba vitima detein iha sela, ida nee husi parte investigasaun nian mak hatene klean kona-ba ida nee.
Aleinde nee sasin AS deklara katak, nia iha konhesimentu oituan ba José Bernando neebe tara aan iha sela no matebian lori ba halo indentifikasaun, tanba liga ho kazu baku sidadaun joven ida neebe baixa iha Hospital Nasional Guido Valadares (HNGV).
Sasin deklara, momentu neeba sasin hatene Jose Bernardo tara aan, liu husi kontaktu neebe halo husi arguidu TV ba sasin mak informa katak, suspeitu neebe ohin lori mai iha sala kuridor tara aan ona.
Sasin mos esplika ba Tribunal katak, prosesu identifikasaun baibain uza livru rua, ida ho kor mean rejista suspeitu neebe banhira iha problema grave, no kor Verde atu rejista problema neebe ladun grave.
Rona tiha sasin sira, Tribunal adia hikas ba loron seluk hodi rona deklarasaun husi sasin sira.
Audensia julgamentu nee prezide husi Juiz Prezidente Jose Escurial no Juiz adjuntu Fransisca Cabral no Afonso Carmona, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Eustaquio Guterres no Juvinal Dias.
(ter)
