DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial VdS, tanba komete krimi Furtu Agravadu.
Tuir akuzasaun neebe iha katak, arguidu VdS nuudar motorista rezervadu iha lezadu nia kompanhia China Harbour neebe lokaiza iha Portu Tibar Likisa.
Iha loron haluha, maibe iha fulan Setembru tinan 2022, iha oras la apuradu iha Tibar Likisa, arguidu foti gazoel husi kareta tanki 8 nian.
Total gazoel arguidu foti husi tanki kareta sira refere ho kuantidade hamutuk litru 1000.00. Hafoin arguidu foti tiha gazoel ho kuantidade refere, arguidu faan ba sasin Nuno Fransisco Bareto ho kuantidade litru 50 ho folin US$ 35.00, enkuantu restu arguidu uza ba nia kareta.
Gazoel ho nia total 1000.00 neebe arguidu foti lezadu sosa kada litru ho valor US$ 1.60, nunee total husi kuantidade refere ho valor US$ 1600.00. Konsekuensia husi arguidu nia aktu nee hamosu prejuizu ba lezadu ho valor US $ 1600.00.
Tanba nee Ministeriu Publiku konstitui arguidu nuudar autor material ba krimi Furtu Agravadu neebe previstu iha artigu 252 husi Kodigu Penal.
Hatan ba faktus nee, arguidu hili direitu silensiu, tanba nee Tribunal deside hodi rona deklarasaun husi sasin.
Sasin Balerio Martins dos Santos deklara katak, momentu neeba sasin mak hanesan Xefe seguransa, momentu neeba sasin tama servisu dader no rona lezadu informa ba sasin katak mina lakon no ema hasai mina husi kareta boot 8 neebe tula sasan husi Kaitehu mai iha Portu Dili.
Sasin deklara, kona-ba mina lakon nee lezadu rona informasaun husi trabalhador ida ho naran Valerio, tanba nee mak lezadu informa ba iha sasin hodi ba hatoo keixa iha PSIK. Durante iha PSIK sasin la tama ba iha laran, tanba nee sasin la hatene kona-ba Valerio no lezadu nia deklarasaun.
Sasin mos rekonhese kona-ba mina lakon sasin la haree diretamente ho matan, maibe sasin rona tutan deit informasaun husi lezadu.
Iha sala julgamentu laran, Tribunal la rona deklarasaun husi lezadu, tanba lezadu ba tiha ona rai liur, maibe Tribunal haree katak antes nee lezadu presta ona deklarasaun iha Ministeriu Publiku, tanba nee Juiz prosesu lee sai fali deklarasaun lezadu nian antes nee katak, lezadu sofre prejuizu ho valor US $ 1600.00, tanba mina lakon husi kareta.
Rona tiha deklarasaun sira nee, Tribunal husu ba iha Ministeriu Publiku no defeza atu tama ba iha alegasaun.
Iha alegasaun Prokurador deklara katak, arguidu hili direitu silensiu, maibe Ministeriu Publiku bazeia ba deklarasaun husi lezadu iha autus no mos deklarasaun husi sasin, MP haree katak lezadu sofre duni prejuizu. No bazeia ba faktus neebe iha hatudu katak mina refere lakon duni iha fatin neebe arguidu servisu ba.
Tanba nee MP solisita ba iha Tribunal atu kondena arguida hodi selu fali prejuizu neebe iha, maibe MP sei duvidas ho prejuizu nee, tanba nee husu Tribunal atu tetu didiak hodi aplika ba arguidu indimnizasaun fali prejuizu neebe iha.
Enkuantu Advogadu solisita ba iha Tribunal atu absolve arguidu, tanba konsidera katak mina neebe lakon lezadu no sasin la haree ho matan, maibe rona tutan deit informasaun husi ema seluk.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu Jose Maria, Ersilia de Jesus, Ana Paula, Ministeriu Publiku reprezenta husi Prokurador Pedro Baptista, arguidu hetan asistensia legal husi Advogadu Privadu Xisto.
(ter)
