DILI, STLTIMORLESTE.com – Tribunal Judisial Primera Instansia Dili halao julgamentu ba arguidu nain 3 ho inisial FGS, SMR no DP, tanba komete krime furtu agravadu.
Julgamentu nee halao iha loron Tersa, (15/10/2024) neebe prezide husi Juiz koletivu.
Iha sala julgamentu laran, Juiz Prosesu Ana Paula lee sai akuzasaun neebe iha katak, iha loron 06 Dezembru 2023, akontese insidente ida iha lezada AG nia hela fatin iha Metiaut.
Antes nee, lezada AG nia maun RG para hela lezada nia motorizada Honda Beat Street, besik hela iha fatin refere.
Iha fatin nee, arguidu FSG hamutuk ho nia kolega sira hanesan EBI lao ba iha fatin neeba, hodi haree hela motorizada neebe para hela iha oin.
Depois, kolega EBI dulas motor neebe para hela nia bolante hodi halo fatin save motor nian aat tiha, hodi hamutuk ho arguidu FSG lori motor ses husi fatin neeba.
Rezultadu husi arguidu FSG nee, lezada hetan prezuizu ho montante US$ 1.200.00.
Antes nee mos lezadu EML para hela nia motorizada ida iha nia rezidensia Fomento. Iha momentu neeba arguidu SMR hamutuk ho nia kolega EBI desloka ba iha fatin neeba ho intensaun atu naok motor. Too iha neeba kolega EBI lao tama ba iha varanda lezadu nian, no arguidu hamriik iha liur hodi halo vijilansia.
Minutu depois, kolega EBI konsege dudu motor sai husi fatin nee no motor ba para iha arguidu SMR nia uma.
Konsekuensia husi arguidu SMR nia aktu nee, lezadu EML sofre prezuiju US$ 1.400.00.
Iha loron 20 Dezembru tinan 2023, iha rezidensia lezadu CS neebe lokaliza iha Taibesi. Iha momentu neeba arguidu DP ba iha fatin refere ho intensaun naok motor hodi utiliza viajen ba Same.
Arguidu konsege foti duni motor refere hodi halao viajen ba Same. No arguidu mos troka xapa matrikula husi motor nian.
Husi arguidu nia hahalok nee, lezadu SC sofre prejuizu hamutuk US$ 1.550.00.
Nunee ikus mai identifika katak, motor 3 neebe arguidu sira foti mak hanesan Honda Beat Streat nain mak lezada AG, no Honda Beat nain mak EML no Honda Revo Fit nain mak lezadu SC.
Ho aktu sira nian, Ministeriu Publiku akuza arguidu nain tolu, FGS, SMR no DP, hanesan autor material ba komete krime Furtu Agravadu neebe previstu iha artigu 252 husi KP.
Hatan ba akuzasaun neebe iha, arguidu FSG deklara katak, momentu neeba kolega EBI mak bolu arguidu sira hodi hemu tua hamutuk. Hemu tiha tua kolega EBI mak mata dalan hodi ba buka motor ba foti, maibe arguidu sira la hatene buat ida, tanba nee tuir deit kolega EBI.
Arguidu deklara, motor neebe foti laos para iha arguidu nia uma, maibe para iha kolega EBI nia uma, depois intelijen sira ba kaer tiha arguidu mak arguidu lori intelijen sira ba iha kolega EBI nia uma hodi foti motor. No motor neebe foti entrega kedan ba iha intelijen sira.
Arguidu rekonhese hahalok neebe nia halo la diak, arguidu arepende tebes, maibe arguidu deklara momentu neeba arguidu la hatene buat ida, tuir deit sira nia kolega EBI.
Aleinde nee, arguidu DP katak, momentu neeba arguidu mak foti duni lezadu nia motor iha Taibesi hodi konduz ba Same.
Arguidu mos rekonhese, motor neebe uza arguidu konsege troka nia numeru plat, no ikus mai intelijen sira hatene hodi foti hikas motor.
Rona tiha deklarasaun husi arguidu nain tolu, Tribunal adia ba loron seluk hodi rona deklarasaun husi lezadu sira.
Audensia julgamentu nee prezide husi Juiz Koletivu, Jose Maria, Ersilia De Jesus, Ana Paula, Ministeriu Publiku reprezenta husi Prokurador Pedro Baptista, arguidu hetan asistensia legal husi Advogadu Privadu nain rua.
(ter)
