DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba arguidu nain 3 ho inisial MMO, ET no AM kona-ba naok iha Likisa, hodi kontinua rona sasin.
Iha sala julgamentu laran Kinta nee Tribunal kontinua rona sasin Rozelia Misela Dos Reis.
Iha sala julgamentu laran sasin deklara katak, sasin servisu iha loja refere, no momentu neeba depois servisu remata sasin mos fila ba sira nia uma hodi deskansa, maibe sasin sira nia uma distansia la dook malu ho loja refere, loja iha oin no sasin sira nia uma iha kedan loja nia kotuk.
Sasin deklara, sira deskansa hela maizumenus iha tuku 4 dader ema ida ba dere sasin sira nia odamatan, tanba nee sasin mos rona hodi haruka nia laen sai mai haree, maibe sasin nia laen haree sasin nia patraun hamutuk ho nia apa mak ba iha sasin sira nia uma hodi dere odamatan nee.
Tanba nee sasin nia laen mos bolu sasin, ho ida nee sasin hader mai haree ba sasin nia patraun nia rentos raan hela, no sasin nia patraun koalia ba sasin ho nia laen katak, ema tama iha loja. Ho ida nee sasin hamutuk ho nia laen ho patraun inklui patraun nia aman sira lao ba iha loja laran hodi haree sasan, maibe sasan rungu ranga los. Tanba nee mak sasin haruka patraun hodi kontaktu ba iha Polisia.
Sasin deklara, kona-ba se mak halo patraun raan no foti osan iha loja sasin la hatene, maibe ikus mai mak sasin sira rona fali katak, ema neebe tama loja iha nain tolu Polisia kaer ona hela nain ida mak seidauk.
Aleinde nee sasin CY hanesan nain ba kareta hodi fo aluga ba arguidu sira deklara katak, momentu neeba iha ema ida mak ba iha sasin nia fatin hodi husu aluga kareta.
Sasin deklara, sira aluga kareta no sira hateten ba sasin katak atu ba halao servisu balu iha Likisa. Sasin mos deklara kareta neebe sasin fo aluga sasin la lori buat ruma taka metin plat kareta nian, se kareta nia plat tak metin ida nee arguidu sira mak halo aktu ida nee.
Banhira Tribunal haruka sasin haree ba arguidu nain tolu, sasin deklara kleur ona tanba nee sasin la lembra ona arguidu ida neebe mak ba foti kareta.
Rona tiha sasin nain rua, Tribunal adia fali ba loron seluk hodi rona sasin sira.
Antes nee arguidu ET deklara katak, momentu neeba nia kolega ida naran SK mak telefone arguidu hodi haruka ba foti kareta iha Rental, depois foti tiha kareta arguidu ET husu ba SK katak ita atu ba neebe SK mos hatan katak, atu ba hemu tua. Ho nunee mak arguidu ET mos dehan se nunee hau kontaktu ba hau nia kolega nain rua hodi ita ba hemu hamutuk, tanba nee maka arguidu ET mos kontaktu fali ba nia kolega nain rua arguidu MMO no arguidu AM hodi ba tula sira nain rua, hamutuk sira nain tolu ho SK sira nian haat ba hemu tua iha Largo Lecidere.
Arguidu ET deklara, hemu tiha tua depois fila husi Largo Lecidere sira ho kareta liu husi Ponte Foun, no too iha Loja ida iha Kampu Baru besik Hospital nian, SK haruka arguidu para kareta iha loja oin, no SK mak tun uluk lori save ida selok loja nee nia odamatan, depois bolu ajuda ba arguidu MMO no AM hodi hiit odamatan. Depois SK tama uluk ba loja laran hamutuk ho arguidu nain rua MMO no AM hodi foti sasan. Maibe arguidu ER la tama ba loja laran, iha deit kareta laran.
Arguidu ET deklara, SK mak foti sasan hanesan osan atus ida, besi hiit nee rua, no sasan kiik balu. No osan neebe SK foti nia dehan katak, osan nee atu ense mina kareta nian.
Arguidu deklara, foti tiha sasan iha Loja nee, arguidu konduz kareta hodi lori arguidu nain rua MMO no AM ba hatun tiha iha Tasi Tolu, no kontinua lori SK ba hatun iha Kolmera, depois lori Kareta ba entrega tiha arguidu ET kontinua fila mai uma ho Taxi.
Arguidu ET deklara, iha loron 28 nee SK mak kontinua telefone arguidu haruka ba foti kareta iha rental, tanba nee arguidu mos ba foti kareta, no momentu neeba arguidu husu ba SK katak, foti kareta atu ba neebe, SK hateten katak atu ba tula sasan.
Arguidu deklara, rona tiha SK koalia nunee arguidu ET mos kontaktu ba arguidu MMO no AM hodi sira ba, no momentu neeba SK haruka sira atu ba iha Likisa, no iha dalan SK hateten ba sira katak, se tula duni buat nee, sira sei fahe osan no ema ida sei hetan rihun ida resin kada ema ida.
Arguidu deklara, antes tama iha Likisa sira sei para kareta iha dalan hodi hemu tua, depois to tiha iha Likisa sira kontinua ho kareta liu ba Likisa nia sorin para hela iha Mota laran ida. Depois kalan ona sira fila fali mai iha Likisa, no to iha Loja ida nia oin SK haruka para arguidu mos para.
Arguidu deklara, para tiha kareta SK tun uluk hodi sobu odamatan, no hamutuk ho arguidu MMO no AT tama ba iha Loja laran, arguidu hein kleur sira la sai mai arguidu mos tuir tama ba. Iha laran arguidu ET hare SK hamrik besik fatin kasir nian, no arguidu foin hase, SK dehan ba arguidu katak se tauk ten lalika mai ida, SK kontinua ba foti tudik entrega ba iha arguidu MMO no AM inklui arguidu ET kaer, hodi tama ba iha lezadu sira nia fatin.
Arguidu deklara, sira tama ba iha lezadu nia fatin lezadu toba hela, tanba nee sira lori deit ID Card nia talin mak futu lezadu. No SK kontinua tama ba iha lezadu nia oan mane nia kuartu, hodi latan katana ba nia oan mane nia hirus matan, no lezadu nia oan mane dehan ba SK katak, kolega keta oho foti osan karik foti ba.
Arguidu deklara, foti tiha brankas osan nian, tua no sigaru sira fila ona, mai iha dalan maka sira fera brankas hodi sura osan hamutuk rihun lima. No osan nee sira fahe kada ema ida rihun ida resin, tua sira hemu hotu no sigaru iha SK.
Arguidu deklara, depois Polisia kaer tiha sira, osan sira entrega hotu ona.
Arguidu MMO deklara katak, faktus neebe iha loos hotu, maibe arguidu la hatene momentu ho intensaun sai ho kareta nee ba naok. Arguidu hanoin ba tula sasan tanba nee maka arguidu mos ba.
Arguidu deklara, momentu iha Loja ida Kampu Baru arguidu mos tama ba laran, maibe la foti sasan SK mak foti sasan. No iha Likisa arguidu la lori tudik, maibe SK maka fo sabit ida ba arguidu kaer, no rekonese lori duni ID Card nia talin futu lezadu.
Arguidu deklara tan, momentu ba Likisa nee SK dehan deit ba tula sasan, tanba nee maka arguidu mos hakarak hodi ba. No osan neebe fahe arguidu hetan atus ida resin, maibe Polisia kaer arguidu entrega kedan ba Polisia iha momentu neeba.
Arguidu AM deklara tan, faktus neebe konsta iha akuzasaun loos, maibe momentu neeba arguidu sira lao tuir deit SK. No arguidu la hatene momentu sira lao nee atu ba naok, se hatene nunee arguidu sei laba.
Arguidu AM deklara, SK mak haruka arguidu sira futu lezadu no osan neebe iha sira fahe no arguidu nian entrega ona ba Polisia.
Iha faktus sufisiente katak, iha loron 25 fulan Marsu tinan 2024, haleu oras tuku Hh00 kalan, arguidu ET (kondy) kontaktu via telefone ho arguidu sira MMO no AM, tuir mai tula sira nain rua ho kareta ho marka MAZDA CX7 matrikula A.12-470 TL hodi lao pasiar iha area Dili laran.
Iha tuku 02h50 arguidu sira diriji ba loja Wang Jhong sita iha Kanpung Baru Komoro Dili, para tiha kareta iha loja hodi mos save roda ida no safenda ida, tuir mai arguidu SK selok odamatan loja no arguidu nain tolu ajuda hit sae odamatan ho forsa hodi nakloke, tama ba loja laran hodi foti naok sasan mak hanesan tuir mai nee.
Osan cast US$ 650,50, Pulsa TT, Telemor, Telkomsel hamutuk folin us 300 americano, Tip Telemor tobol 3, spiker bot ida folin US$ 38, Perfun tolu no Kadeli biasa tolu folin US$ 9.00 , Besi Gym 2 folin osan US$ 46, Brinkus haat no kelu kopu tolu ho folin US$ 17, total montante US$ 127. 50.
Tuir mai liu tiha loron 3 iha loron 28 fulan Marsu 2024, haleu oras tuku 02.50 OTL, arguidu sira hafoin kontaktu malu, sai husi Dili diriji ba Likisa ho kareta Toyota Prado matrikula 23-035 TL neebe hetan aluga husi lezadu Cai, hafoin fo volta iha Dili laran oras hirak nia laran.
Hafoin too iha loja LEADSO nia oin, sira iha Aldeia Leopa, Suku Dato, Munisipiu Likisa, hafoin para kareta arguidu SK mak tun uluk husi kareta, hodi mos safenda ida save roda hodi selok no sobu odamatan hafoin nakloke arguidu sira nain tolu ajuda hiit sae odamatan.
Tuir mai sira tama ba loja laran, arguidu MMO hahu sobu kamera CCTV no arguidu AM hafuhu ema iha liur, no arguidu SK hahu hakat ba loke gaveta haree osan laiha, arguidu SK obriga sira nain tolu dehan tama deit ba sira nia kuartu hodi fanu deit ona.
Tuir mai arguidus sira idak-idak foti lampada tau ba ulun foti mos katana no sabit iha loja laran hodi uza, sira nain haat diriji ba lezadu nia kuartu hodi futu uluk nia aman lezadu Wang yong chao, hotu tiha arguidu MMO hein lezadu no arguidu ET no AM akompanha SK hakat ba lezadu XX nia kuartu, silu nia liman rua ba kotuk arguidu ET no AM hahu kesi nia liman no ain, tuir mai suspeitu SK se katana hodi husu dehan uang dimana”, lezadu hatan dehan osan iha neeba, labele hamate hau.
Tuir mai SK hit brankas sai husi janela, arguidu nain tolu foti tan sigaru slop 26, tua legend butir hitu (7) butir bet ida kiik tolu hamutuk tua butir sanulo (10).
Hafoin hodi brankas, sigaru no tua dirigi mai Dili no sira fera brankas nee iha area Ponte Komoro Dili, hodi fahe osan total us 5.000 kada ema ida hetan 1.250 americano, nune mos sasan sira seluk hanesan sigaru no tua.
Konsekuensia husi arguidus sira nia hahalok ba faktus rua nee no maneira hodi save roda hodi tama foti naok ema nia sasan iha loja laran ho maneira selok odamatan no osan iha brankas ho total us 5.000 americano no sasan sira hanesan tua no Sigaro iha tempu kalan fo prejuizo ba lezadus sira ba faktus primeiro ho prejuizo 1.127.50 no faktus segundo no prejuize total US$ 7.000.
Argundus sira mos involve iha kasu registada ho Nuc 0387/2015/DICMR. mic 0369/2021/DICMR, nuc 0748/2018/DICMR.
Arguidus sira halo ho forma livre, deliberada e konsientemente la obsta sira nia komportamento, hodi aproveita iha tempu kalan para fasil liu hodi selok odamatan tama foti naok ema nia sasan hodi hetan benificio, apesar de hatene muito bem katak konduta nee lei proibe.
Nunee konstitui arguidus sira ET, MMO no AM hanesan autoria material ba krimi rua Furtu Agravadu artigu no artigu 253 no 2 Kodigu Penal actual e um krim de Armas Branka artigu 20 Lei n 7 /2017 de Abril.
Audensia julgamentu nee Prezide husi Juiz Koletivu, Arjentino Nunes, Zulmira Auxiladora, Ivan Patrocenio, Ministeriu Publiku reprezenta husi Prokurador Domingos Barreto, arguidu hetan asistensia legal husi Advogadu Privadu Manuel Tilman.
(ter)
