DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida Aprezentasaun Periodika (AP) ba arguidu nain rua ho inisial NdSP no JA.
Arguidu sira lori mai iha Tribunal, no Ministeriu Publiku (MP) promove arguidu sira ho krimi Furtu Agravadu.
Tribunal halo tiha identifikasaun ba arguidu nain rua, ikus mai deside aplika medida AP ba arguidu sira.
“Arguidu nain rua neebe deskonfia katak, antes nee komete krimi naok telefone iha loja Jaco Store nian, sira nega faktus,” dehan Defeza arguidu nian, Germano Guterres Ramos ba jornalista sira iha Kaikoli, Tersa (18/11/2025).
Nia hatutan, iha alegasaun MP husu atu aplika medida Prizaun Preventiva, no husi defeza nian husu atu aplika medida ida neebe justu no kmaan.
“Tribunal deside aplika medida Aprezentasaun Periodika kada fulan ida aprezenta aan dala rua iha dia 16,” dehan nia.
Nia afirma, ligasaun ho ida nee, antes nee iha arguidu nain tolu tama ona iha Prizaun Preventiva.
Prosesu nee prezide husi Juiz Jose Gonsalves, Ministeriu Publiku reprezenta husi Prokurador nain ida, arguidu hetan asistensia legal husi Defensor Publiku Germano Guterres Ramos no Emilio Ribeiro.
Antes nee Autoridade Seguransa Polísia Nasionál Timor Leste (PNTL) liu husi Diresaun Servisu Investigasaun Kriminál (DSIK) ho Diresaun Servisu Informasaun Polísia (DSIP) ezekuta mandadu Tribunál Judisial Primeira Instansia Dili, detein joven nain rua envolve iha kazu sobu loja Jaco Store iha area Fatuhada foin lalais nee.
Sidadaun joven Timoroan nain rua nee Autoridade Seguransa PNTL kaptura bazeia ba mandadu Tribunál Judisial Primeira Instansia Dili ho NUK 0349/25.PNSIC.
Suspeitu nain rua ida kaer iha Ainaro, ida kaer iha Postu Administrarivu Nain Feto.
Nunee kazu sobu loja Jaco Store naok telefone neen, akontese iha loron 03 Novembru 2025, tuku 04:00 madrugada, envolve sidadaun Timoroan nain neen, daudaun nee nain tolu ho naran inisial VSS (18), YGKS (20) no SRM (20) kumpri hela prizaun preventiva iha prizaun Bekora.
Jornalista: Terezinha De Deus
Editor: Xisto Mendonça
