DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu nain 4, tanba komete iha krimi Furtu Agravadu.
Tuir akuzasaun neebe Juiz prosesu Arjentino Nunes lee sai katak, iha loron 27 Marsu 2024, iha madrugada, arguidu JTS, tula arguidu AX ho motorizada matrikula T6526 liu husi area Bebora.
Arguidu AX haree hetan motorizada neebe estasiona hela iha uma oin area Bebora, tuir mai arguidu haruka para motorizada, no arguidu AX tun husi motorizada, dirije kedan ba uma neebe motorizada estasiona hela.
Depois arguidu AX indentifika katak, motorizada refere la iha save ka bolante la save, nunee arguidu dudu motorizada sai mai iha estrada boot.
Tuir mai arguidu AX sae motorizada nee, no arguidu JTS sae motorizada neebe antes nee sira nain rua sae, hodi dudu ka tebe husi kotuk hodi mai iha hela fatin Matadoru.
Too iha uma no loron nee kedan, arguidu AX sobu rahun motorizada refere, hodi monta ba motorizada seluk ho nia matrikula T 4819 neebe arguidu naok antes ona, nunee bele faan ba ema seluk.
Nune mos arguidu PCR no arguidu JSMF mos simu motorizada sira neebe naok, hodi sobu rahun no hadia.
Konsekuensia husi arguidu sira nia hahalok, halo lezadu sira neebe motor lakon sente prejuizu.
Tanba nee, Ministeriu Publiku akuza arguidu nain 4 komete krimi Furtu Agravadu neebe previstu iha artigu 252 husi Kodigu Penal.
Hatan ba akuzasaun neebe iha, arguidu AX konfesa ba faktus. Arguidu deklara katak, momentu neeba arguidu hasoru malu ho arguidu TJS, no arguidu mak iha inisiativa ba buka ema nia motor hodi naok, hodi hasai nia mesin ka pesa hodi tau fali ba motor seluk neebe aat neebe arguidu soke.
Arguidu rekonhese, arguidu mak bolu duni arguidu TJS, no too iha Bebora arguidu rasik mak haree motor ida para hela, ho nunee mak arguidu mos tun hodi dudu sai motor husi fatin refere, no para iha arguidu nia uma.
Arguidu deklara, too iha arguidu nia uma, arguidu rasik mak sobu motor nee rahun, atu hasai motor nia pesa hodi monta fali ba motor neebe aat no para hela iha arguidu nia uma.
Arguidu mos rekonhese, razaun sobu motor rahun atu nain labele hatene.
Kona-ba arguidu nain rua seluk PCR no JSMF arguidu konhese sira hanesan bairu laran, maibe kona-ba envolve foti motor nee, arguidu la hatene ida. Maibe kona-ba arguidu TJS arguidu AX rekonhese, arguidu refere mak tula arguidu hodi ba foti motor, maibe atu sobu motor rahun arguidu TJS la iha ona arguidu AX nia uma, no ida nee arguidu AX mak sobu mesak.
Arguidu deklara, antes nee halao servisu hanesan mekaniku, no naok laos ho razaun atu faan fali motor nee, maibe atu sobu motor neebe naok nia pesa no mesin sira tau ba motor neebe aat no para hela iha arguidu nia uma.
Momentu foti tiha motor, liu tiha loron hirak Polisia Intelijensia ba foti kedan arguidu no motor, no ikus mai arguidu foin hatene motor refere nain mak Abilio Mesquita.
Arguidu deklara foin primera vez halo aktu nee, no arepende tebes ba aktu nee, no halo aktu ida nee tanba kondisaun lanu.
Aleinde nee, arguidu JTS deklara katak, momentu neebe arguidu AX mak husu ajuda ba arguidu JTS atu tula arguidu hodi ba foti motor, no too iha Bebora arguidu AX mak tun hodi tama ba dudu motor sai mai liur, arguidu TJS hein deit iha motor leten.
Arguidu rekonhese, arguidu AX foti tiha motor nee, arguidu AX mak konduz motor refere, no arguidu TJS konduz nafatin motor neebe antes nee sira nain rua ba.
Kona-ba motor sobu rahun arguidu TJS la iha konhesimentu, tanba motor kuandu para ona iha arguidu AX nia uma, arguidu TJS mos la iha ona uma refere, ses ona husi fatin neeba.
Arguidu mos deklara, nia laos naok ten, maibe momentu neeba kondisaun lanu mak tuir deit arguidu AX.
Arguidu PCR deklara katak, kona-ba motor neebe lakon arguidu la iha konhesimentu ida. Arguidu iha konhesimentu mak momentu neeba arguidu simu motor ida husi joven ida naran Lolek, atu hadia. No motor neebe arguidu simu la iha plat, no Lolek promete ba arguidu katak, kuandu hadia hotu bele telefone nia atu mai selu.
Momentu neeba arguidu hadia hotu tiha, telefone ba Lolek maibe Lolek dehan katak, osan seidauk iha tanba nee mak arguidu mos seidauk fo motor ba Lolek, no motor nee para hela iha arguidu nia uma.
Arguidu deklara, liu tiha loron balu, Polisia Intelijensia ba kaer arguidu, no foti hotu motor neebe para. Arguidu deklara arguidu laos mak ema neebe foti motor, maibe simu deit motor husi Lolek hodi hadia. No ikus mai mak arguidu foin rona katak, motor nee nain husi ema Suai.
Arguidu JSMF deklara katak, kona-ba motor neebe lakon arguidu la iha konhesimentu ida, maibe arguidu iha konhesimentu kona-ba motor neebe entrega husi Berek ba arguidu.
Arguidu deklara, momentu neeba arguidu iha hela uma, derepente Berek liu husi arguidu nia uma oin husu ajuda ba arguidu atu para hela motor iha sira nia uma, tanba nee arguidu mos aseita atu para motor nee iha sira nia uma, no Berek halai lakon tiha.
Arguidu deklara, liu deit minutu balu Polisia Intelijensia ba kedan iha arguidu nia uma, foti arguidu no motorizada. Arguidu deklara motor neebe Berek foti se nian, ida nee arguidu la hatene loloos nain mak se.
Arguidu nega, arguidu laos envolve iha grupu naok ten ida.
Iha sala julgamentu laran, lezadu Abilio Mesquita deklara katak, momentu neeba nia motorziada ida lakon duni, maibe ikus mai rona fali arguidu sira mak foti.
Lezadu husu deit arguidu sira atu selu fali lezadu nia motor neebe foti ona, tanba motor nee tulun sira hodi halao servisu.
Rona tiha lezadu nia deklarasaun, Tribunal husu ba iha Prokurador atu tama ba iha alegasaun.
Liu husi alegasaun nee, Prokurador Domingos Barreto husu ba Tribunal atu tetu deklarasaun hotu, no ba arguidu AX no JTS husu atu sosa fali lezadu nia motor ida, kuandu la sosa tenke responsável ba kriminal, no ba arguidu PCR no JSMF husu Tribunal tetu hodi aplika kastigu ba sira nain rua, tanba motor neebe para iha sira nia uma, rezultadu husi naok motor ema nian.
Enkuantu husi defeza Marsal Mascarinhas deklara, kona-ba arguidu nain rua AX no JTS konfesa imparsial ba faktus, promete sei sosa motor ida fo ba lezadu, no ba arguidu nain rua seluk PCR no JTMF husu atu absolve sira nain rua, tanba laos sira nain rua mak naok motor.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Zulmira Auziliadora, Ivan Suritai, Arjentino Nunes, Ministeriu Publiku reprezenta husi Prokurador Domingos Barreto, arguidu hetan asistensia legal husi Advogadu Privadu Manuel Tilman, no Defensor Publiku Marsal Mascarinhas.
(ter)
