DILI, STLTIMORLESTE.com – Kazu omisidiu neebe Timoroan halo iha rai laran no liur, hanesan inan ho parseiru oho oan, nunee mos laen oho feen ho kondisaun gravida, nee hatudu aktu inmoral no kontra Maromak nia doutrina.
Kazu omisidiu sira neebe akontese halo Deputadu Bankada PD, Manuel Noronha lamenta ho hahalok inan ho nia parseiru neebe oho oan rasik, tanba kontra Maromak nia doutrina.
“Situasaun akontese iha rai liur, maibe nee hamonu imajen Timor Leste, tanba aktu neebe sira halo, ema temi Timoroan, ida nee lamentavel, oho ita nia oan hanesan ita oho aan rasik, tanba oan nee ita nia raan, tanba nee autoridade seguransa presiza haree i hatun pena neebe todan”, katak Deputadu PD, Manuel ba STL iha PN, Dili, Segunda nee (21/10/2024).
Kazu oho oan tuir Deputadu nee laos deit akontese iha rai liur, maibe iha rai laran mos Inan ho Aman barak mak laiha responsabilidade estraga no soe bebe, ida nee aktus inmoral neebe akontese.
Labarik nee inosente, laiha sala, tanba nee presiza fo sansaun neebe todan, labele tinan 4 ka 5, ida nee tenke todan liu, para sira bele halo reflesaun ba aktus neebe sira halo.
“Hau liga oituan ba Amu Papa Francisco mai vizita Timor durante loron 3, neebe lori Domin no Dame mai Timor, Papa nia mensajen dehan nunee, kuidadu labarik sira tanba sira mak futuru rai nee nian, maibe Timoroan fila halo oin seluk, hodi hatudu sira nia inmoral”, tenik Deputadu nee.
Tuir nia, ba buka servisu iha ema nia rain, maibe ikus halo hahalok neebe hafoer Timor nia naran, hamonu imajen Timor, tanba nee husu autoridade seguransa no Tribunal atu fo pena todan.
Entretantu kona-ba kazu laen oho feen ho kondisaun grávida, nia parte seidauk rona kronolojia husi kazu nee, maibe atu hatete deit katak, antes sira nain 2 forma uma kain, konhese malu uluk, bainhira sei joven.
“Husu ba Rede Feto atu haree kazu omisidiu neebe laen ida oho nia feen, ho kondisaun grávida, tanba nee husu mos ba parte seguransa no Tribunal atu haree no fo pena seriu, tanba kazu hasai ka halakon ema nia vida kontra Maromak”, nia hatete.
Deputadu nee husu ba sidadaun hotu atu kria moris neebe iha dame, pas no domin iha família no sosiedade, nunee kontribui ba pas iha nasaun. Nuudar ema kriatura sempre iha emosaun, maibe koko oinsa atu hatun emosaun nunee buat hotu bele rezolve ho kakutak neebe malirin.
Nunee mos STL koko konfirma ho Sekretaria Estadu Igualdade (SEI), Elvina Sousa, maibe nia parte okupadu hela ho servisu seluk, tanba nee seidauk iha tempu atu atende media, bianhira iha tempu mak konfirma ho media atu bele entrevista.
(gui)
