DILI, STLTIMORLESTE.com – Iha loron 06 Julhu 2025, oras 11:00 OTL, kazu omisidiu neebe akontese iha Munisipiu Ainaro, daudaun nee Komando Polísia Nasional Timor Leste (PNTL) liu husi Diresaun Servisu Investigasaun Kriminal Nasional (DSIKN) detein ona suspeitu ho inisial MD iha Eskuadra PNTL Dom Aleixo, Komoro, hodi tuir prosesu investigasaun.
Nia dehan, komunidade informa Polísia Munisipiu Ainaro katak, sira hetan mate isin ida hamutuk ho nia motor inklui ekipamentus balun iha rai lolon boot ida.Hafoin hetan informasaun, Polísia Munisipiu Ainaro halo kedas intervensaun, identifika katak, sidadaun ida naran Pergrina da Conceição naran istimadu Amina, ho idade tinan 23 mate iha fatin Jakarta 2.
“Servisu Informasaun Polísia (SIP), Servisu Investigasaun Kriminal hamutuk ho Komando PNTL Munisipiu Ainaro, Komando PNTL Munisipiu Likisa, ita halo tracking kedas ba informasaun hirak neebe ita rekolha no ikus mai iha oras 09:00 kalan, suspeitu ho inisial MD ita kaptura iha Munisipiu Dili area Dom Aleixo ninian, no agora daudaun hakarak informa ba públiku katak, suspeitu iha ona polísia nia liman, iha Sela Detensaun Eskuadra PNTL Dom Aleixo, Komoro,” hatete Portavoz Komando PNTL, Superintendente Polísia João Belo dos Reis ba jornalista sira liu husi konferensia imprensa iha Komando Jeral PNTL Kaikoli, Dili, Segunda (07/07/2025).
Nia esplika, kronolojia husi akontesimentu nee labele koalia iha nee, tanba hola parte iha Segredu Justisa no agora daudaun prosesu investigasaun sei lao hela. Hakarak informa mos katak mate isin oriseik kedas evakua ona mai Dili, agora iha ona Hospital Nasional Guido Valadares (HNGV) hodi hein prosesu Autopsia.
“Prosesu Autopsia sei termina katak, mate nee kauza husi oho ka ema baku, investigasaun sei lao hela no ema neebe ita deskonfia envolve iha kazu nee ita asegura ona no vitima orijin husi Suku Asumanu, Munisipiu Likisa, suspeitu sei kumpri iha Sala Detensaun durante oras 72 nia laran hafoin sei aprezenta ba Ministeriu Públiku (MP),” nia informa.
(jen)
