DILI, STLTIMORLESTE.com – Komisariu Komisaun Anti Korrupsaun (KAK), Rui Pereira hatete, KAK no PSIK servisu hamutuk, oinsa bele konklui investigasaun ba kazu roo Haksolok, maibe sira sei hein rezultadu auditoria.
Nia dehan, kona-ba roo Haksolok halao ona enkontru ho Ministeriu Publiku, sira mos informa ba malu oinsa solusiona kazu nee, entermus investigasaun kriminal, uluk kazu nee entrega mai iha KAK, maibe vakum, entrega fila fali ba iha Ministeriu Publiku no delega fali ba iha PSIK.
“Komisariu mos ami hein hela, tanba Primeiru Ministru husi parte Governu sei halo auditoria, rezultadu auditoria nee mak orsida sei entrega dokumentus nee mai iha KAK, hanesan dokumentu neebe mak sai nesesidade atu ita halo prosesu investigasaun,” dehan Komisariu KAK, Rui ba jornalista sira iha Farol, Dili, Tersa (14/01/2025).
Nia hatutan, kazu roo Haksolok mak publiku no partidu politiku sira kestiona kona-ba roo nee, tanba roo Berlim Ramelau mai tiha ona, tanbasa mak roo Haksolok too ohin loron seidauk mai hela deit.
Komisariu sira iha informasaun katak, roo refere uluk iha filmajen ida hatudu kalen sira nee balu ferujem, maibe iha informasaun husi staf sira neebe ba iha Portugal no konsege vizita, haree katak kalen sira nee taka fali ona, roo refere komesa hadia oituan oituan ona, maibe presiza osan boot mak hodi kansela, osan hirak ba tiha se presiza tan osan nee lalos ona.
“Se presiza osan boot, gastu boot nia rezultadu hanesan nee, sei haree took lei KAK nian no Kodigu Penal no lei Medida Prevensaun Kombate Korrupsaun fo dalan sei haree artigu neebe relevante, aban bainrua sei investiga klean, maibe too tempu ida ema sira neebe asumi responsabilidade tenke iha, se sasan despeza sira nee mout deit labele, presiza iha responsabilidade ba autor sira neebe lo-loos sira tenke asumi,” dehan nia.
Iha fatin hanesan, Diretor Investigasaun KAK, Jose Verdial dehan, prosesu roo Haksolok uluk iha KAK, maibe momentu Komsariu seidauk iha sira remesa tiha ba iha Ministeriu Publiku.
“Prosesu roo Haksolok iha tinan 2023 kuandu iha hela vagatura ba Komisariu nian, iha Dezembru ami remesa kedan ba iha Ministeriu Publiku ho relatoriu interklar, tanba sei iha prosesu Investigasaun,” dehan Jose.
(ter)
