BAUKAU, STLTIMORLESTE.com – Polisia Nasional Timor Leste (PNTL) Komando Munisipiu Baukau identifika ona autor nain 5 ba kazu taa ema nain 2 iha Suku Samalari, Postu Administrativu Baukau Vila.
“Akontese iha neeba bainhira Polisia too, servisu hamutuk ho Xefe Suku halo identifikasaun ba suspeitu nain 5, agora daudaun ita identifika hela ba kazu taa nian,” relata Komandante Komando Polisia Munisipiu Baukau, Superintendente Xefe Polisia Antoninho Mauluta ba jornalista sira iha Vila Nova, Tersa (15/10/2024).
Komandante nee esplika, suspeitu nain 5 refere ho inisial IO idade 68, RS 27, ERF 23 JAB 24 no MM idade 22, neebe deskonfia hakanek vitima SDCF idade 23 no EF idade 52 liu husi taa.
Nia fundamenta, bainhira situasaun nee akontese parte seguransa too kedas fatin akontesimentu hodi hakalma situasaun no evakua vitima nain 2 ba HoREX hodi halo tratamentu, tanba vitima SDCF hetan kanek grave iha ulun parte karuk, neebe daudaun halo hela tratamentu iha sala I.C.U no EF idade 52 heran kanek knaan iha parte liman kabas karuk.
Mauluta sublina, hafoin loron 14 parte kalan ho asaun tuda malu iha Suku refere, parte seguransa konsege hakalma, maibe iha loron 15 purvolta tuku 08:00 dader kontinua tan mosu tuda malu no konsege sunu uma hela fatin ida no estragus ida.
Nia deklara, suspeitu sunu uma refere ho inisial J nuudar maun ba vitima SDCF neebe kanek grave nia maun, neebe daudaun hases aan hela husi parte Polisia, maibe sei buka tuir hodi prosesu.
(EST 2)
