DILI, STLTIMORLESTE.com – Tribunal Judisial Primeira Instansia Dili, kontinua rona sasin ba kazu Jose Bernardo nia mate iha Sela Detensaun Kaikoli.
Iha julgamentu kontinuasaun nee sasin AS deklara katak, momentu neeba sasin halao knaar hanesan Membru PNTL, nudar Xefi Seksaun Justisa Komandu Munisipiu Dili. No knaar neebe sasin halao maka hanesan ofisial de guia hodi kontrola membru sira iha postu no membru sira neebe tama servisu, no hatoo mos relatoriu ba Komando.
Sasin deklara, momentu neeba sasin maka halo relatoriu ba Komando konaba vitima nia mate, no sasin hare vitima mate tara an ho fiu metan telekomcel nian ida, no iha masa ida maka iha vitima nia sorin. Momentu sasin tama ba hare vitima mate iha sela laran, ema barak ona maka antes nee iha neeba.
Sasin deklara, nia papel mos hodi kontrola sela, maibe tuir sasin nia hare sela neebe iha, CCTV la funsiona, fiu sira trankadu, no sasin halo ona relatoriu eskrita ba Komando. Tuir sasin responsabilidade atu halo sela nee diak, Komando Munisipiu Dili nian.
Antes atu hahu julgamentu, Juiz prosesu Jose Escurial lee sai akuzasaun neebe mai husi Ministeriu Publiku katak, iha loron 31 fulan-Setembru tinan-2022, arguidu AAM nudar investigador iha Eskudara PNTL Vera Cruz, simu informasaun husi denunsiante Verdiana da Silva, neebe mak informa katak nia alin ho naran Gaudencio Felipe da Silva, hetan baku iha loron 01 fulan-Setembru, tinan-2022 haleu tuku 04H00 madrugada, lha aldeia 01, suku Kaikoli, Postu administravu Vera Cruz, Munisipiu Dili, agora daudaun denunsiante nian alin nee baixa hela iha Ospital Nasional Guidu Valdadares.
Hafoin simu tiha informasaun referidu, arguidu AAM ho arguidu TCPE, dezloka kedan ba Ospital Nasional Guido Valadares ho objetivu atu rekolha informasaun husi Gaudencio Felipe da Silva, maibe arguidu sira la konsege foti informasaun husi Gaudencio tanba iha hela sala operasaun.
Bainhira fila husi Ospital Nasional Guido Valadares, arguidu AAM kontinua rekolha informasaun husi Sra. Verdiana da Silva no husi informasaun sira nee identifika katak, vitima Jose Bernardo de Jesus Soares ho nia kolega sira mak halo agresaun fiziku hasoru Gaudencio Felipe da Silva.
Ho nune arguidu AAM hamutuk ho arguidu TCPE, inklui membru PNTI balu-tan, dezloka imediatu ba iha aldeia 01, suku Caicoli, postu Administrativu Vera Cruz, Munisipiu Dili hodi halo detensaun ba vitima Jose Bernardo de Jesus Soares ho nia kolega nain rua ho naran Paulo Mendonça ho Osorio da Costa Carvalho.
Arguidu sira AAM ho arguidu TCPE halo detensaun ba vitima vitima Jose Bernardo de Jesus Soares ho nia kolega Paulo Mendonca Osorio da Costa Carvalho, ho objetivu hodi lori ba halo identifikasaun iha iha oras 12 (sanulu resin rua) nia laran iha Eskuadra PNTL postu Administrativu Vera Cruz nian.
Hafoin halao tiha identifikasaun iha oras 12 (sanulu resin rua) nia laran, arguidu sira liberta tiha vitima nia kolega Paulo Mendonca ho Osorio da Costa Carvalho, no vitima Jose Bernardo de Jesus Soares, kontinua asegura iha Eskuadra PNTL.
Tanba Eskuadra PNTL munisipiu Vera Cruz la ejiste sela detensaun, ho nunee arguidu AAM fo orientasaun ba arguidu ACPE lori vitima ba hatama iha sela detensaun Komando Munisipiu Dili.
Arguidu ACPE lori vitima ba iha Komando PNTL Munisipiu Dili akompana husi vitima nia inan no to iha Edefisiu Komando nian, arguidu ACPE entrega imediata vitima ba arguidu TV hodi hatama ba sela detensaun laran, sein konfirma ba Komandate Investigasaun Munisipiu Dili Mariano Soares nudar nia Superior.
Durante iha sela detensaun nia laran arguidu TV maka tau matan ba vitima, no la autoriza familia sira husi vitima nian atu hare vitima.
Bainhira vitima nia bin tenta atu hakbesik ba iha vitima atu koalia, arguidu TV hakilar ho lian makas nee laos imi nia uma ka merkadu.
Arguidu sira halo detensaun ba vitima ho nia kolega nain rua ho objetivu atu halo indentifikasaun iha oras 12 nia laran, maibe saida maka akontese halo tiha indentifikasaun arguidu sira deside lori vitima ba hatama iha sela detensaun, sem justifikasaun ruma.
Depois ida nee iha loron 1 Setembru 2022 iha oras 06:30 akontese vitima Jose Bernardo de Jesus Soares mate iha Sela detensaun komandu PNTL Munisipiu Dili.
Tanba nee, MP akuza arguidu nain tolu hanesan, ko autora material ho forma konsumada pratika krime Sekuestru neebe previstu iha artigu 160 husi Kodigu Penal.
Audiensia julgamentu nee prezide husi Juiz Prezidente Jose Escurial no Juiz adjuntu nain rua Fransisca Cabral no Afonso Carmona, Ministeriu Publiku reprezenta husi Prokurador Aderito Tilman, no arguidu hetan asistensia legal husi Defensor Publiku Eustaquio Guterres no Juvinal Dias.
(ter)
