DILI, STLTIMORLESTE.com ‐ Kazu sona malu neebe akontese iha loron 27 fulan Abril iha Karatina Tasi-Tolu, rezulta vitima ho naran Vitor Govia da Cruz baixa kedas iha Hospital Nasional Guido Valadares (HNGV) no Polisia Nasional Timor Leste (PNTL) kaptura ona suspeitu ho inisial CC.
Komandante PNTL Munisípiu Dili, Superintendente Xefe Polísia Orlando Gomes dehan, iha kazu ida neebe akontese iha loron 27 fulan Abril loraik iha mini merkadu karantina Tasi-Tolu nee suspeitu inisial CC sona kanek vitima Vitor Govia da Cruz too lori ba halo tratamentu iha HNGV.
“Ita kaptura kedas suspeitu no deitein 72 oras, depois vitima ita evakua kedas ba HNGV hodi halo tratamentu, tanba vitima hetan sona iha kidan,” hatete Superintendente Xefe Polísia Orlando Gomes ba jornalista sira iha Komando PNTL Munisipiu Dili, Segunda (28/04/2025).
Nia esplika, kazu nee nia mutivu tanba ódiu vingansa malu, tanba dun malu naok manu madena, ho ida nee mak iha momentu neeba suspeitu toba hela no suspeitu nia feen prepara aan atu ba misa iha Tasi-Tolu. Suspeitu nia feen hase ba vitima, vitima mos hakat mai basa suspeitu nia feen, tanba nee mak suspeitu hader mai foti tudik sona iha vitima ninia kidan.
“Kazu ida nee ita prosesu no aprezenta ona ba Ministeriu Públiku,” nia deklara.
Nia informa, kazu ida nee PNTL konsidera tentativu omisidiu no konjuta ho arma branka nomos evidensia sira nee PNTL asegura hotu ona depois submente ba prosesu.
Iha fatin hanesan, Fontes Konfirmadu iha Sala Emerjensia HNGV esplika, vitima ho naran Vitor Govia da Cruz idade 34 anos neebe hetan sona no kanek grave, agora daudaun baixa hela sala beda laki.
“Sim, Vitima nee mai iha sala emerjensia ho ita nia PNTL, hau la hatene motivu husi problema nee, mai tama mai ami halo atendimentu, depois haruka baixa iha laran, tanba nia kanek nee todan oituan,” nia afirma.
(jen)
