DILI, STLTIMORLESTE.com – Polisia Nasional Timor Leste (PNTL) Eskuadra Dom Aleixo Munisipiu Dili, detein suspeitu nain 3 tanba deskonfia envolve iha kazu sona vitima ida iha Universidade da Paz, iha loron 21 Outubru 2024.
Komandante Eskuadra Dom Aleixo, Alexandre da Costa “Samurai” hatete, estudante sira nee eskola iha UNPAZ neeba, tuir lo-loos nee intelektualidade nee iha ona, mais sira agora laiha estudante ida mak ba tuda malu fali iha resintu Universidade nian sona malu fali iha neeba.
“Tanba nee mak ohin ami simu informasaun, ita haruka kedas patrulhamentu ba iha neeba kaptura sira mai, agora sira nain 4 iha sela laran, vitima halo hela tratamentu iha hospital,” dehan Alex ba jornalista sira iha Eskuadra Dom Aleixo, Komoro, Dili, Segunda nee (21/10/2024).
Nia dehan, orsida vítima sei fila fali mai hatoo nia deklarasaun kauza husi saida, parte Polisia foti ona dadus investigasaun ba tuir ona para investiga kona-ba motivu saida mak sira ba sona malu iha UNPAZ. Ladun kontenti, tanba lo-loos nee eskola ona too Universidade nee ema neebe mak intelektual nia kapasidade hanoin nee luan.
“Enves de utiliza espasu eskola hodi aprende, maibe uza hodi halo fali krime,” dehan nia.
Nia akresenta, hanesan autoridade seguransa kontinua buka tuir kaptura sira neebe mak envolve iha krime neebe mak asaltu malu iha eskola sira nee, ida nee ita sei buka tuir nafatin.
Enkuantu vitima nain ida mak hetan kanek no suspeitu nain 3 mak agora daudaun deteim hela iha sela laran no evidensia sira lori mai ona hanesan tudik.
(mar)
