DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial GJS, SSD no JD, tanba komete krime Danu ho Violensia.
Iha sala julgamentu laran Juiz prosesu Jose Maria lee sai akuzasaun katak, iha loron 28 fulan Setembru 2015, haleu oras tuku 20h00, lezadu VC nuudar membru PNTL COE konduz nia motorizada marka yamaha vixion, matrikula F. 1535 TL, husi uma atu ba servisu fatin iha Bairo Pite, Dili, bainhira too loja Marobo II nia oin, iha Aimutin Dili, lezadu haree arguidu nain tolu, GJS, SSD, JD ho grupu taka dalan no lezadu iha deit estrada klaran.
Arguidu JD kaer katana ida iha liman hodi taa kedas lezadu, maibe lezadu ses aan hodi katana nee kona iha motorizada nia tanki leten parte los, nunee lezadu mos monu tun ba rai.
Bainhira lezadu hamriik, arguidu JD kaer lezadu nia liman sorin karuk no haruka arguidu GJS lori tudik sona lezadu nia kakorok, maibe lezadu hakruk hodi tudik nee kona iha lezadu nia rentos, halo lezadu monu tan dala ida ba rai mak arguidu SSD lori fatuk boot ida hodi tuda kona iha lezadu nia ulun sorin los.
Entaun lezadu koalia ba arguidu nain tolu dehan, “hau Polisia”, maibe arguidu sira hatan katak, “o Polisia nee, ami labele baku o ka”, tuir mai arguidu nain tolu halo tan agresaun hasoru lezadu.
Tuir mai Inspetor Polisia, VDC haree ida nee, hasai arma pistola hodi tiru ba leten, nunee arguidu nain tolu ho nia maluk sira hakfodak hodi halai husi fatin akontesimentu.
Lezadu aproveita hodi konsege halai husi fatin akontesimentu nee no halai too iha Klinika Cito nian mak hetan ajuda husi membru PNTL CSP nain ida, hodi transporta lezadu ba HNGV hodi halo tratamentu.
Tanba nee, Ministeriu Publiku akuza arguidu nain tolu komete krimi Danu ho Violensia neebe previstu iha artigu 260 husi Kodigu Penal.
Hatan ba akuzasaun neebe iha, arguidu deklara katak, faktus neebe konsta iha akuzasaun lalos hotu. Momentu akontese problema nee arguidu iha hela nia uma, no arguidu sai husi sira nia uma mai haree grupu asaltu malu entre grupu PSHT no 77, no arguidu pertense ba grupu 77, aleinde mos arguidu nain rua seluk.
Arguidu deklara, nia la haree arguidu nain rua seluk, too problema nee hotu. Arguidu deklara, momentu neeba arguidu haree lezadu uza motor ida gas ho makaas no lori ho grupu ida mak lao hamutuk mai, tuir husi motor kotuk.
Depois sira hasoru malu iha estrada klaran hodi tuda malu, no lezadu atu fila motor sai la diak ona, lezadu mos para tiha motor iha arguidu sira nia oin kedan. Arguidu la kaer buat ida iha liman no la taka dalan, no arguidu nega la lori katana taa lezadu, maibe kaer deit fatuk iha liman hodi tuda malu.
Kona-ba akuzasaun dehan arguidu mak haruka GJS lori tudik sona iha lezadu nia kakorok, arguidu nega ida nee lalos. No momentu neeba mos lezadu la aprezenta aan dehan nia Polisia no lezadu ho kondisaun lanu.
Arguidu deklara tan, sira tuda malu hela iha Polisia ida sira hela vizinhu mak lori pistola tiru sae ba leten, ho nunee sira foin fahe malu, no iha kareta ida mak mai para iha arguidu nia oin hodi tula lezadu.
Arguidu haree lezadu la monu ba rai, aleinde lezadu nia motor mos la monu ba rai, tanba lezadu mak para rasik hela.
Iha sala julgamentu laran sasin VDC hanesan PNTL deklara katak, nia hela iha Aimutin no konhese arguidu sira tanba hanesan sira nia vizinhu, no hela besik liu ho arguidu JD.
Sasin deklara, momentu neeba nia fila husi servisu no iha grupu rua mak ataka malu ida sai husi diresaun Hudi Laran no ida husi Aimutin Obralan nian, no sasin informa kedan ba iha sira nia servisu fatin.
Momentu neeba sasin bolu arguidu JD no dehan ba nia katak, haruka imi nia grupu sira nee tama ba laran, tanba Polisia atu mai halo atuasaun, no sira idak-idak tama ba sira nia hela fatin, sasin mos tama ba iha sasin nia uma.
Sasin deklara, sasin atu deskansa ona mak labarik sira neebe hela ho sasin bolu dehan ema asaltu malu, sasin hatais fali nia farda sai ba haree grupu rua nee asaltu malu hela, no sasin helik hela iha besi riin ida, no haree lezadu mos hatais farda Polisia nian ho motor ida mai, no grupu ida husi Aimutin nian mos halai tuir kedan lezadu nee, no grupu rua nee halai hasoru malu no lezadu iha klaran.
Sasin haree grupu rua nee hasoru malu sira la taa malu, maibe hasai katana taa fali Polisia ka lezadu nee, tanba nee mak sasin hasai Pistola hodi tiru sae ba leten.
Sasin deklara, depois mak lezadu mos rona sasin tiru, hodi nunee sasin halai ba iha lezadu, maibe sasin la lori ho motor ida.
Rona tiha arguidu no sasin, Tribunal adia ba loron seluk hodi rona lezadu.
Audensia julgamentu nee prezide husi Juiz Koletivu, Ana Paula, Ersilia de Jesus, Jose Maria, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensor Publiku Manuel.
(ter)
