DILI, STLTIMORLESTE.com – Ministeriu Publiku (MP) iha alegasaun ba kazu sosa roo rua ba iha Atauro no Suai, solisita ba iha Tribunal Koletivu atu absolve arguidu nain 10 ho inisial DC, MCA, CL, MM, AC, PARM, AFXR, LMR, AL no AB.
Iha alegasaun nee Prokurador Domingos Gouveia deklara katak, husu ba iha Tribunal Koletivu atu absolve arguidu sira, maibe husu mos Tribunal atu haree mos ba iha erru administrativu neebe arguidu sira komete.
Aleinde nee Defensor Publiku Fernando da Costa iha nia alegasaun deklara katak, aseita ho pedidu Ministeriu Publiku kona-ba absolvisaun. Maibe defeza konsidera arguidu sira la pratika erru administrativu, tanba nee husu Tribunal atu absolve total arguidu sira husi krimi neebe akuza ba atu labele prejudika fali arguidu sira nia pozisaun iha futuru.
Rona tiha alegasaun nee, Tribunal Koletivu deside adia ba loron seluk hodi rona desizaun.
Tuir faktus neebe iha katak, iha loron 14 fulan Setembru tinan 2015, Ministeriu Edukasaun liu husi Diresaun Nasional Eskola Teknika Vokasional aloka orsamentu ho montante US$ 159,075.00 atu sosa roo rua ba iha Eskola Peskas nian.
Iha prosesu nee kompanhia Chipys Unip, Lda mak sai vensedor, hetan aprovasaun husi arguidu DC no Ministru Edukasaun.
Iha loron 28 fulan Setembru divizaun aprovezionamentu publika rezultadu konkursu, asina husi arguidu DC no AP. Iha tinan 2015 selebra kontratu fornese roo rua ba Eskola Peska Atauro no Suai ho montante US$ 142,400.00 asina husi arguidu AB, hanesan Diretor Kompanhia AC hanesan Ministru Edukasaun, AP hanesan Diretor Jeral Servisu Korporativas.
Iha loron 7 fulan Novembru ofisial aprovizionamentu ida, prosesu ordem kompra ba roo kapital menor ho montante US$ 142,400.00 aprova husi arguidu DC.
Iha loron 16 fulan Novembru tinan 2015, ofisial administrasaun prepara dokumentus ho montante US$ 142,400.00 sertifika husi MJS aprova husi arguidu DC.
Iha loron 16 fulan Dezembru tinan 2015, arguidu AB haruka karta ida ba iha arguidu DC, Diretor Nasional Aprovizionamentu hodi informa kona-ba roo neebe sosa.
Iha loron 19 fulan Dezembru tinan 2015, arguidu MCA haruka karta ida ba iha arguidu DC, kona-ba resposta pedidu husi arguidu AB Diretor Kompanhia, relativamente pedidu nova espesifikasaun ba roo, no arguidu MC aprezenta nova espesifikasaun ba roo multifunsaun.
Iha loron 30 fulan Dezembru tinan 2015, Diresaun Jeral Tesouru Ministeriu Finansa transfere osan ho montante US$ 142,400.00 ba konta bankaria kompanhia.
Iha loron 05 fulan Maiu tinan 2016, arguidu AB haruka karta ida ba iha arguidu DC hodi haruka ekipa sira ba halo inspesaun ba roo. Iha loron 09 fulan Maiu tinan 2017, arguidu AB haruka karta ida ba arguidu DC atu halo inspesaun ba roo refere husi ekipa inspesaun ME.
Iha loron 22 fulan Maiu tinan 2017, arguidu AB hanesan Diretor Kompanhia aprezenta dokumentus Delivery Order ba arguidu DC hanesan Diretor Nasional Aprovizionamentu.
Iha loron 22 fulan Maiu 2017, arguidu AB hanesan kompanhia nain aprezenta mos dokumentus envoice ba MJ Diretor Nasional Aprovezionamentu.
Iha loron 30 fulan Maiu, arguidu MCA hanesan Diretor Nasional haruka karta ida ba iha Ministru Edukasaun, ho objetivu ba aprovasaun mudansa kuantidade espesifikasoins kona-ba roo rua, no roo ida mak iha ona portu Dili.
Ministru la aprova pedidu nee, tanba iha loron 1 fulan Junhu tinan 2017 arguidu AB hanesan Diretor Kompanhia, CL Diretor Jeral Administrasaun Finansa Internu, DC Diretor Nasional Aprovizionamentu, MC Diretor Nasional Eskola Teknika, asina kontratu emenda ho kuantidade espesifikasaun roo rua ba iha roo ida ho montante hanesan US$ 142,400.00 sem aprovasaun husi Ministru.
Arguidu AB, MCA, DC no CL devia labele halo alterasaun ba kontratu orijinal, tanba roo iha ona portu Dili no halo ona inspesaun husi ekipa sira iME nian.
Iha loron 6 fulan Junhu tinan 2017, arguidu DC haruka karta ida ba Diretora Pagamentu Ministeriu Finansas hodi Release Bank. No iha loron 13 fulan Junhu tinan 2017, arguidu MM no PAR asina dokumentus pedidu pagamentu ba kompanhia ho montante US$ 142,400.00.
Iha loron 27 fulan Junhu 2017, arguidu MM no LMR asina dokumentus no relatoriu neebe mai husi inspesaun. Iha loron 28 fulan Junhu tinan 2017, arguidu PARM no arguidu MM prosesa pedidu pagamentu ho montante US$ 142,400.00 ba kompanhia.
Iha loron 30 fulan Junhu tinan 2017, arguidu LMR, MM asina formulariu rejistu patrimoniu ba roo.
Maibe realidade roo refere depois sosa too agora la halo operasaun tuir akordu neebe iha. Tanba nee fo prejuizu ba Estadu ho montante US$ 142,400.00.
Tanba nee MP akuza arguidu sira hanesan DC, MCA, CL ba krimi Abuzu Poder iha artigu 297 Kodigu Penal.
Arguidu MM, AC, PARM, AFXR, LMR, AL, AB ko-autor ba krimi Administrasaun Danoza artigu 274 Kodigu Penal.
Audensia julgamentu nee prezide husi Juiz Koletivu Jose Escurial, Fransisca Cabral, Afonso Carmona, Ministeriu Publiku reprezenta husi Prokurador Domingos Gouveia, Arguidu sira hetan asistensia legal husi Defensor Publiku.
(ter)
