DILI, STLTIMORLESTE.com – Tribunal Judisial Primeira Instansia (TJPI) Dili, halao julgamentu ba arguidu inisial PC (profesor STM Bekora) tanba komete krime hasoru ninia estudante ho inisial JRWLG. Krime neebe akuza ba PC, krime Ofensa Integridade Fisika Simples (previstu iha Artigu 145 Kodigu Penal).
Informa Juiz Prosesu Jose Quintao. Maibe lei refere, ninia natureza semi publiku. Fo dalan atu dada fila kazu refere. Liu husi Tentativa Konsiliasaun, lezadu JRWLG (vitima) deside perdua arguidu PC. Ikus, JRWLG perdua ninia profesor no ba futuru arguidu labele halo tan hahalok nee ba estudante sira seluk. PC aseita ho lezadu nia pedidu. Tribunal desde homolonga prosesu kazu nee no absolve arguidu husi instansia.
Tuir akuzasaun MP, arguidu PC ho lezadu JRWLG nudar mestri no aluno iha STM Bekora, Dili. Iha dia 27 de Frevereiro 2024, tuku 11:14 OTL iha STM Bekora, bainhira lezadu ho ninia kolega sira iha aula laran, ida-idak konversa halimar tanba mestri seidauk tama.
Lakleur PC tama aula laran, depois bolu estudante sira ida por ida, atu hatama TPC. Iha kotuk, lezadu nia kolega, naran Oscar husu ba lezadu, “Tuir O nia hanoin, muzika ida neebe diak liu”. Lezadu hatan “Crime song”. Rona ida nee arguido bolu kedas lezadu ba oin hodi husu, “Iha kotuk O dehan saida”. Lezadu hatan, “Ohin Oscar husu muzika. Hau hatan dehan, Crime Song mak diak liu”.
Tan deit ida nee, arguidu tuku dala ida ba lezadu nia hirus matan, basa dala 2 ba nia hasan parte los no karuk, basa dala 4 ba lezadu nia kotuk laran. Lezadu sente moras no bubu. Depois lezadu hatoo keixa ba polisia.
Ho hahalok nee, PC komete krime ho voluntaria, livre no konsientemente. Nia mos konsiente, nudar mestri ida, nia labele halo hanesan nee ba ninia estudante. Nia tenki fo exemplo diak ba alunu sira.
Audensia julgamentu preside husi Juiz Singular, Jose Quintao, MP reprezenta Prokurador Aderito Tilman, no arguidu hetan asistensia legal husi Defensor Publiku, Manuel Exposto.
(ter)
