DILI, STLTIMORLESTE.com – Tribunal Judisial Primeira Instansia Dili liu husi desizaun ba prosesu Primeiru Interogatoriu, deside aplika medida prizaun preventiva ba arguidu ho inisual DM hanesan laen, neebe taa mate nia feen inisial AM iha Munisipiu Ermera, Suku Hatulia Vila, Aldeia Hatubatu.
Ministeriu Publiku promove arguidu mai iha Tribunal ho krimi omisidiu.
Iha sala julgamentu laran, Juiz Turnu Jose Gonsalves halo tiha identifikasaun ba arguidu, ikus mai Juiz deside iha despaisu ikus hodi aplika medida prizaun preventiva ba arguidu.
Iha alegasaun ba prosesu nee, husi parte Prokurador Ricardo Leite husu Tribunal atu aplika medida Prizaun Preventiva ba arguidu. Enkuantu husi parte defeza mos aseita ho medida nee, tanba vitima mate ona, asegura arguidu iha lai prizaun hodi hein prosesu investigasaun.
Arguidu lori mai iha Tribunal, akompanha husi autoridade seguransa Munisipiu Ermera, depois depaisu Tribunal nian arguidu lori kedan ba iha Prizaun Bekora.
Tuir informasaun neebe iha, motivu husi akontesimentu nee tanba arguidu hakarak simu sira nia oan husi lezada ba kous, maibe lezada la fo ida. Ho nunee arguidu hanoin katak, serake labarik nee arguidu nia oan ka lalos mak lezada la fo ba arguidu kous.
No lezada hasai tan lia fuan buan ba arguidu, momentu neeba arguidu la simu no katana ida mos rai besik hela arguidu nia sorin, ho nunee arguidu nee foti kedan katana taa lezada iha parte hasan, kotuk laran, kanuruk, liman no ikus mai rezulta lezada mate.
Lezada mate husik hela oan kiik neebe foin halo fulan ida.
Prosesu nee prezide husi Juiz Turnu Jose Gonsalves, Ministeriu Publiku reprezenta husi Prokurador Ricardo Leite, arguidu hetan asistensia legal husi Defensor Publiku, Fransisco Martins.
(ter)
