DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial FJL, tanba lori sasan kroat taa lezadu nain 2 ho inisial LMP no JS. Prosesu refere antes nee Tribunal rona ona arguidu nia deklarasaun, no iha julgamentu kontinuasaun iha loron Kuarta nee Tribunal kontinua rona deklarasaun husi sasin sira.
Iha sala julgamentu laran sasin AS deklara katak, iha momentu neeba sasin iha uma laran no odomatan taka hela, derrepente sasin rona arguidu tebe odomatan dala ida sasin mos tauk hodi hakilar dehan, Joanico ajuda lai.
Sasin deklara tan, sasin hatene arguidu FJL mak tebe odomatan, tanba antes nee arguidu ho sasin nia laen iha problema.
Sasin mos deklara tan, kona-ba arguidu nia feen ho sasin nia laen amante, ida nee sasin la hatene, depois de mosu problema nee mak sasin foin hatene.
Sasin deklara, sasin haree ho matan arguidu taa lezadu JS nia liman fuan ikun parte karuk. Rona tiha sasin nee Tribunal adia ba loron seluk hodi kontinua rona sasin.
Tuir akuzasaun neebe antes nee iha katak, iha loron 20 fulan Outubru tinan 2024 por volta 00h24 arguidu sai husi nia uma, hodi ba buka nia ferik oan iha mane ida naran N nia uma iha Aitarak Laran, tanba deskonfia arguidu nia feen iha relasaun amante ho N.
Banhira ba iha fatin refere arguidu la hasoru nia feen, maibe hasoru deit arguidu nia feen nia alin lezada LMP, no arguidu husu kona-ba nia feen, lezada hateten ba arguidu katak, arguidu nia feen iha leten.
Derepente la iha justifikasaun ruma, arguidu hasai katana ida hodi taa ba iha lezada nia liman loos. Tuir mai arguidu kaer samurai ida hodi ba buka N iha nia uma, arguidu too iha N nia uma oin, N nia feen hakilar husu ajuda, no lezadu JS rona lian nee no sai husi lezadu nia kuartu atu ajuda.
Derrepente arguidu hamriik no taa lezadu JS husi kotuk, hodi rezulta raan.
Tanba nee Ministeriu Publiku akuza arguidu komete krimi tolu, lrimi Ofensa Grave rua no krimi Arma Branka ida.
Hatan ba akuzasaun neebe iha, arguidu deklara katak, faktus neebe iha balu loos no balu laloos, kona-ba data fatin no oras loos, akontese iha Aitarak Laran, no problema nia hun tanba deskonfia feen amante ho mane seluk.
Arguidu deklara, sira problema mak sira hela fahe malu, tanba arguidu nia feen selingkuh, arguidu hare N tula arguidu nia feen. Momentu neeba iha oras tuku 10 kalan arguidu atu ba nia feen nia uma iha Aitarak Laran, maibe seidauk too uma arguidu hasoru N ho nia feen, arguidu husu ba N dehan o mak tula hau nia ferik oan no N hatan ba servisu mak tula, no arguidu hatan imi diresaun la hanesan nusa mak tula malu, no N tuku arguidu dala ida iha parte los no arguidu monu, haree ema barak arguidu mos halai ba uma Bairo Pite foti katana, momentu neeba arguidu ho motor.
Depois arguidu foti tiha katana ba fali Aitarak laran hodi husu ba nia feen nia alin, depois arguidu nia feen nia alin hatan katak, arguidu nia feen sae ba leten, ho ida nee arguidu lori katana baku ba iha nia feen nia alin nia liman, no momentu neeba arguidu kondisaun lanu.
Arguidu dehan, nia lori katana ida no samurai ida, arguidu rekonhese lezadu rua mak kanek, no lezadu NS lori buat ida atu sona arguidu nia sorin mak arguidu liki samurai hodi kona lezadu.
Iha sala julgamentu laran lezadu JS deklara katak, momentu neeba lezadu toba hela iha kuartu laran, derrepente rona AT bolu ho lian makaas dehan ajuda lai, rona ida nee lezadu sai ba liur, lori ho aisar hamoos uma laran nian, sai ba AT nia uma odomatan nian nee lezadu dada odomatan, derrepente arguidu mosu iha kotuk lori katana ida ho ai suak ida atu taa lezadu nia kotuk mak lezadu lori aisar tahan mak kona lezadu nia liman fuan ikus parte karuk kotu.
Lezadu deklara tan, altura neeba lezadu husu ajuda iha nia inan kiik sira mak lori lezadu ba ospital, depois ba hatoo keixa.
Lezadu mos deklara tan katak, antes nee lezadu la hatene arguidu iha problema ho nia feen, lezadu hatene sira nia problema nee hafoin ba halo keixa iha eskuarda mak foin hatene problema nee.
Lezadu mos relata katak, antes problema hotu lezadu hetan kontaktu husi arguidu nia familia sira katak, problema nee atu rezolve familia depois lezadu hein too agora la rezolve tuir familia.
Audensia julgamentu nee prezide husu Juiz Koletivu, Ivan Patrocino, Arjentino Nunes, Zulmira Auxiladora, Ministeriu Publiku reprezenta husi Prokurador Aderito Tilman, arguidu hetan asistensia legal husi Defensor Publiku Nelson Borges.
(jac)
