DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida Aprezentasaun Periodika (AP) ba arguidu ho inisial AdCF.
Arguidu lori mai iha Tribunal, Prokurador Antonio Tavares promove arguidu ho krime Arma Branka no Krime omisidiu ho forma tentada neebe previstu iha artigu 138 konjuga ho artigu 23 no mos artigu 24 husi Kodigu Penal Timor Leste nian.
Halo tiha indentifikasaun ba arguidu, iha faze alegasaun Prokurador Antonio Tavares husu Tribunal atu aplika medida Prizaun Preventiva ba iha arguidu.
Enkuantu husi parte defeza, Defensor Publiku Sergio Dias Quintas, husu Tribunal atu aplika medida Aprezentasaun Periodika ba arguidu.
Rona tiha alegasaun, ikus mai Juiza turnu Ersilia de Jesus deside, hodi aplika medida Aprezentasaun Periodika (AP) ba arguidu atu aprezenta aan iha eskuadra polisia neebe hela besik ba semana ida dala rua.
Prosesu nee prezide husi Juiza Ersilia de Jesus, Ministeriu Publiku reprezenta husi Prokurador Antonio Tavares, arguidu hetan asistensia legal husi Defensor Publiku Sergio Dias Quintas.
Tuir kronolojia katak, kazu nee akontese iha loron 25 fulan Janeiru tinan 2026 iha tuku 7 kalan, iha Suku Mascarinhas, Kaikoli rezulta arguidu ta kanek iha vitima nia ulun, liman no kabun, no oras nee dadaun vitima halao hela tratamentu iha HNGV.
No kazu nee akontese, primeiru provokasaun uluk husi vitima S, tanba lori besi kanu baku uluk arguidu nia ulun no liman.
(ter)
