DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba kazu omisidiu ho forma tentada nebee akontese iha Hudi Laran, hodi rezulta lezadu ho inisial NM hetan kanek.
Prosesu refere antes nee Tribunal rona ona arguidu nia deklarasaun, iha julgamentu kontinuasaun nee Tribunal kontinua rona sasin sira.
Iha sala julgamentu laran sasin Santiago Moniz Bere deklara katak, momentu neeba sasin mos partisipa iha serimonia nee. Maibe sasin ho idade neebe sei kiik, tanba nee sasin tur haree ema dansa, no iha oras tuku 10 sasin sente dukur hodi ba deskansa tiha.
Sasin deklara, kona-ba akontese problema nee sasin la iha konhesimentu ida, tanba sasin deskansa tiha ona. No distansia husi fatin akontesimentu ba sasin sira nia uma dook oituan. Kona-ba se mak taa lezadu mos sasin la iha konhesimentu.
Aleinde nee sasin Domingos Maia deklara katak, momentu neeba sasin nia oan feto mak gradua, tanba nee depois de han hotu familia sira mos halo divertimentu. Maibe iha divertimentu nee sasin hamutuk ho nia oan neebe foin gradua, laos ses oituan husi fatin nee ba iha uma laran hodi halo tuir kultura nian kona-ba agradesimentu nee.
Sasin deklara, liu tiha minutu ida mak sasin foin rona barulhu hodi sasin mos halai mai haree, maibe sasin too mai iha fatin nee akontese tiha ona problema, sasan sira mos rahun hanesan kadera no lezadu mos kanek.
Sasin deklara, akotese tiha nunee sasin rona deit ema koalia katak, arguidu JV ho nia grupu mak hemu lanu ba hasobu festa, maibe sasin la haree ho matan ida.
Sasin mos la haree arguidu ida neebe makam taa lezadu, tanba sasin molok toonmai problema liu tiha ona, no arguidu sira mos la iha fatin.
Rona tiha sasin nain rua, Tribunal adia ba loron seluk hodi rona sasin sira seluk.
Tuir akuzasaun neebe iha katak, iha loron 27 fulan Maio tinan 2016 lezadu NM partisipa festa agradesimentu familia ba graduante Ana nudar lezadu nia vizinhu neebe lokaliza iha Hudi Laran Dili.
Iha kalan nee lezadu hamutuk ho nia primu SM ho nia kolega CAS hahu asiste festa nee, husi tuku 21h00 too 24h00 kalan derepente arguidu sira JV, CD, JS no sira seluk deskonhese mai ho kondisaun lanu tama ba tenda laran dansa ho feto sira seluk sem tipu problema.
La kleur deit lezadu haree arguidu JS tuku dala ida hasoru CAS nunee lezadu hamriik hodi sori, maibe arguidu ho nia maluk sira deskonhese halo fali agresaun hasoru hanesan tuku no tebe dala barak iha isin tomak no lori kadera baku nia matan too monu ba rai.
Kuandu lezadu monu ba rai arguidu ho nia kolega sira kontinua no la kleur deit lezadu haree arguidu JV kaer katana ida, no sira seluk mos kaer kroat iha liman halai tama tenda laran diretamente arguidu JV lori katana taa dala 8 iha lezadu nia kabas sorin loos rezulta sinal mean, arguidu nain rua seluk lori katana taa dala rua iha liman karuk.
Kuandu lezadu monu ba rai arguidu hamutuk ho nia grupu kontinua taa lezadu, lori tudik sona iha kabun, lori ambon hana iha lezadu nia liman rezulta sinal mean.
Konsekuensia husi arguidu sira nia hahalok nee halo lezadu sente moras, bubu iha matan loos, kanek iha liman loos no karuk no liman sorin karuk ruin tohar hafoin simu tratamentu iha Hospital durante loron lima nia laran. Katak too ohin loron lezadu nia liman sei sente moras. No lezadu la konsege lakon vida tanba lori lalais ba iha klinika.
Tanba nee, Ministeriu Publiku akuza arguidu sira komete krimi omisidiu Simples ho Forma Tentada neebe previstu iha artigu 138 husi Kodigu Penal.
Audensia julgamentu nee prezide husi Juiz Koletivu, Arjentino Nunes, Ivan Suritai, Zulmira Auxiladora, Ministeriu Publiku reprezenta husi Prokurador Domingos Barreto, arguidu hetan asistensia legal husi Defensor Publiku Eustaqio Guterres.
(ter)
