DILI, STLTIMORLESTE.com – Prosesu sidadaun Filipina, Arnolfo Teves Jr neebe lao hela iha Supremu Tribunal Justisa (STJ), oras nee daudaun hein deit atu tama ona iha faze desizaun nian.
Tuir Prezidente Tribunal Rekursu, Deolindo Dos Santos katak, kazu refere julgamentu foun lao ona, no hein deit tama ba iha desizaun.
“Kazu Teves julgamentu lao hela, hau rasik mos envolve iha Koletivu nee, entaun hau labele hateten ba imi desizaun saida mak foti, maibe atu hateten nia lao hela, imi hotu akompanha depois de anulasaun halao julgamentu foun, agora hein deit desizaun,” dehan Deolindo ba jornalista sira iha Tribunal Rekursu, Kinta (07/11/2024).
Nia hatutan, nia parte labele hatete kona-ba desizaun nebee sei foti, tanba envolve mos iha Juiz koletivu hodi foti desizaun ba prosesu nee.
Iha fatin ketak, Akademiku UNTL, Rafael de Jesus dehan, desizaun Tribunal nian aas liu desizaun hotu, tanba nee sidadaun se deit enklui sidadaun husi nasaun seluk tenke hakruk ba lei neebe iha.
“Ema hotu tenke hakruk ba lei neebe vigor iha ita nia rain, nunee mos haruk mos ba desizaun neebe Tribunal foti, tanba desizaun neebe sira foti hanesan desizaun ikus nian,” dehan nia.
(ter)
