DILI, STLTIMORLESTE.com – Ministeriu Publiku (MP) iha alegasaun ba prosesu Primeiru Interogatoriu kona-ba kazu UNTL, husu Tribunal atu aplika medida Aprezentasaun Periodika (AP), medida Proibisaun de Auzensia no Medida Termo Indentidade Rezidensia (TIR) ba arguidu sira.
Depois Juiz prosesu Arjentino Nunes halo tiha indentifikasaun ba arguidu sira, ikus mai deside hodi tama ba iha faze alegasaun husi Prokurador no Defeza arguidu sira nian.
Iha alegasaun ba prosesu nee, Prokurador Turnu Matias Soares deklara katak, husu Tribunal atu aplika medida Proibisaun de Auzensia no Medida Aprezentasaun Periodika ba arguidu nain tolu hanesan Reitor no Dekanu nain rua. Enkuantu ba arguidu nain tolu seluk, Ministeriu Publiku husu Tribunal atu aplika Medida Aprezentasaun Periodika (AP) no medida Termo Indentidade Rezidensia (TIR) ba arguidu nain tolu.
Aleinde nee, alegasaun husi parte Advogadu Privadu no Defensor Publiku arguidu sira nian, husu Tribunal atu aplika medida Termo Indentidade Rezidensia (TIR) ba arguidu sira.
Depois rona tiha alegasaun husi Ministeriu Publiku no Defensor Publiku sira, Tribunal adia ba loron Sabadu hodi rona despaisu husi Tribunal, kona-ba medida saida mak Tribunal deside hodi aplika ba iha arguidu sira.
Hafoin alegasaun remata Tribunal liberta kedan arguidu sira husi sela detensaun, tanba prazu detensaun liu ona. Depois mak arguidu sira sei mai rona fali despaisu iha Tribunal.
Nunee mos Defeza Cansio Freitas deklara katak, iha alegasaun nia parte husu TIR.
“Husu TIR deit, tanba MP husu aprezentasaun Periodika, promosaun neebe MP aprezenta mai nee jeral deit, la espesifiku krime saida maka imputa ba sira,” dehan nia.
Nia sublina, iha deklarasaun arguidu sira nian deklara katak, la iha indisus forte atu prense rekejitus, konaba dono ba kazu nee.
Prosesu nee prezide husi Juiz turnu Arjentino Nunes, Ministeriu Publiku reprezenta husi Prokurador Matias Soraes, no arguidu nain lima hetan asistensia legal husi Advogadu Privadu no Defensor Publiku.
Rekorda katak, Polisia Nasional Timor Leste (PNTL) liu husi Diresaun Servisu Investigasaun Kriminal Nasional ezekuta mandadu Tribunal Judisial Primeira Instansia Dili (TJPID) ho NUC 086/25-PNSIK hodi halo buska, apreensaun no detensaun ba Reitór Universidade Nasionál Timor Lorosa’e (UNTL) João Soares Martins no dirijente nain lima.
Diresaun Servisu Investigasaun Kriminal Nasional ezekuta mandadu Judisiál hodi halo buska, apreensaun no detensaun nee, relasiona ho violasaun balu neebe akontese iha tinan 2024.
(ter)
