DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida Prizaun Preventiva ba arguidu ho inisial CdA, tanba deskonfia oho nia feen matebian Veronica Dos Santos.
Ministeriu Publiku promove arguidu mai iha Tribunal ho krime omisidiu simples, arma brankas no violensia domestika ho forma ofensa integridade fizika simples.
Iha despaisu ikus Juiz Turnu Cipriano Sarmento deside aplika medida Prizaun Preventiva ba iha arguidu, tanba konsidera iha indisus forte ba krime neebe promove ba arguidu.
Antes nee, iha alegasaun Ministeriu Publiku neebe reprezenta husi Prokuradora Bemvinda Do Rojario husu Tribunal atu aplika medida Prizaun Preventiva ba arguidu, tanba konsidera iha indisus forte ba krime neebe promove mai iha tribunal.
Enkuantu husi parte defeza neebe reprezenta husi Defensor Publiku Sergio Dias Quintas aseita ho pedidu Ministeriu Publiku nian atu aplika medida Prizaun Preventiva ba iha arguidu atu asegura arguidu hodi labele akontese tan problema foun.
Prosesu nee prezide husi Juiz Estajiariu Cipriano Sarmento no Ministeriu Publiku reprezenta husi Prokuradora Bemvinda Do Rojario, arguidu hetan asistensia legal husi Defensor Publiku Sergio Dias Quintas.
Tuir kronolojia katak, iha loron Sabadu (21/03/2026) madrugada haleu oras tuku 03:50 OTL, insidente nee akontese iha Pantai Kelapa tasi ibun besik loja Seara nian, entre feen ho laen, no ikus mai deskonfia laen oho feen.
Iha momentu neeba Forensik foti kedan mate isin lori ba iha mortuariu Hospitál Nasionál Guido Valadares (HNGV) hodi halo autopsia, no arguidu detein kedas iha Komandu munisipiu Dili, hodi submete mai iha prosesu Primeiru Interogatoriu.
(ter)
