DILI, STLTIMORLESTE.com – Deputada Bankada Frente Revolusionariu Timor Leste Independente (FRETILIN), Nurima Ribeiro Alkatiri kondena makaas joven mane nain haat (4) neebe halo violasaun seksual grave hasoru alin feto ho inisial FCL, idade 16, no husu fo pena todan ba autor sira.
Deputada Nurima hatete, koalia kona-ba direitus umanus, aproveita atu koalia kona-ba kazu ida seluk neebe seriu tebes neebe akontese iha iha Timor.
Nia dehan, krime ida nee labele ignora, foin lalais nee, haree iha media kona-ba joven nain haat ka lima halo violasaun seksual ba labarik feto ida ho tinan 16, neebe inosiente hela. Liu tan, sira grava aktu nee no divulga video ba ema seluk.
“Infelizmente, kazu ida-nee laos izoladu, no ida nee nuudar krime ida, no mos nuudar samada atensaun boot ba ita hotu, krime nee grave tebes tanba violensia neebe komete, no tanba hatudu katak iha ema sira iha ita nia rain neebe la tauk atu viola labarik feto ida, atu fo sai ka publika ninia sofrimentu, no atu fahe ida nee hanesan sinal orgullu. Ida-nee hatudu katak buat ruma la loos tebes iha ita nia sosiedade,” hatete nia liu husi Plenaria Parlamentu Nasional, Segunda (26/01/2026).
Nia hatutan, tinan ba tinan rona ona istoria sira kona-ba abuzu, asediu no violensia hasoru feto no labarik sira dala barak, agresor la hetan kastigu. Dala barak, vitima maka sofre tratamentu hanesan sala nain.
“Tinan ba tinan ita rona ona istoria sira kona-ba abuzu, asediu, no violensia hasoru feto no labarik sira dala barak, agresor la hetan kastigu. Dala barak, vitima maka sofre tratamentu hanesan sala nain. Abuzu seksual kuaze sai normalizadu ona iha ita nian sosiedade, Revoltante, triste no ida nee labele kontinua,” dehan Deputada nee.
Nia husu timor oan hotu tenke reflete kona-ba saida maka ema hotu-hotu hakarak ba nia sosiedade. Ezemplu saida mak ema hakarak hatudu bainhira lider sira, figura publika sira, ka ema baibain sira atua ka halo komentariu sira neebe desvaloriza ema seluk, liu-liu feto sira?.
Nia akresenta, iha kazu asediu no abuzu seksual sira, dala barak ema balu koko atu fo razaun ba hahalok agresivu husi violador sira, hodi hatete katak “mane mak nunee” Ida nee sala, no ida nee hanorin katak abuzu nee aseitavel.
“Ema umanu iha kapasidade rasional, ida nee mak diferensia ita husi animal sira, no tenke hanoin no kontrola sira nia asaun sira atu nunee labele halo aat ba ema seluk. Hau hakarak hatete klaru, vitima/sobrevivente husi abuzu nunka iha kulpa,” nia tenik.
(alb)
