AMBENO, STLTIMORLESTE.com – Dadus neebe rekolha husi Polisia Nasional Timor Lorosae (PNTL) Rejiaun Administrativa Espesial Oekusi-Ambeno (RAEOA) iha Tinan 2024, rejista kazu Violensia Domestika Aas iha Oekusi.
Informasaun nee hatoo husi Komandante PNTL Rejional Oekusi, Superintendente Nicolau Francelino da Costa ba STL iha ninia knaar fatin Komando Polisia Rejioanal Santa Rosa Oekusi, Kuarta (22/01/2025) katak, hahu iha 1 Janeiru mai too 31 Dezembru 2024, kazu neebe rejistu iha PNTL Rejional Oekusi mak hanesan tuir mai nee, iha fulan Janeiru 32 Kazu, Fevereiru 20 kazu, Marsu 34 kazu, Abril 26 kazu, Maiu 34, Junhu 42 Kazu, Julhu 32 kazu, Agostu 26 kazu, Setembru 41 kazu, Outubru 54 kazu, Novembru 38 kazu no Dezembru 38 kazu, total kazu neebe rejistu iha tinan 2024 hamutuk 417 kazu.
Tuir dadus neebe mak ami PNTL Rejional Oekusi rejistu iha Oekusi, kazu neebe mak sae aas iha Oekusi mak kazu Violensia Domestika (VD).
Nia haktuir tan katak, kazu neebe rejistu hahu husi eskuadra Polisia mai too Polisia sentru Rejional Oekusi iha tinan 2024 hamutuk kazu 417.
“Planu servisu PNTL Rejional Oekusi halo iha tinan 2025, ita kontinua nafatin halo sosializasaun, halo programa tama sai suku, liu-liu iha linha fronteira, para halo sosializasauan kona-ba prevensaun krimi no kazu Violensia Domestika neebe ninia numeru sae makaas iha Oekusi iha tinan 2024,” haktuir nia.
(jos)
