DILI, STLTIMORLESTE.com – Asistente Eustaquio Guterres hatete, iha fundamentasaun foun, tanba nee mak asistente hatama hikas rekursu ba iha Tribunal Rekursu hasoru desizaun Tribunal Primeira Instansia nian neebe aplika pena prizaun tinan 3 suspende tinan 4 ba arguidu ho inisial MSC, neebe soke mate Zizelma Maria Fatima Verdial Gonçalves.
“Kazu nee desizaun tun mosu dezentendimentu no sai viral kedan, no defeza sai hanesan asistente iha momentu neeba, fo hatene kalma no ami prepara rekursu hatama ona horiseik,” dehan Asistente Eustaquio Guterres ba STL iha Tribunal Dili, Kuarta (16/04/2025).
Nia hatutan, iha fundamentasaun mak husi parte sira hodi hatama rekursu nee, tanba primeiru la aseita ho desizaun Tribunal Primeira Instansia, katak desizaun neebe Tribunal deside aplika ba arguidu pena prizaun tinan 3 suspende ba tinan 4 la eduka no la prevee atu aplika ba arguidu.
Nia hatutan, sai hanesan asistente haree katak iha krimi balu neebe tuir lo-loos Ministeriu Publiku tenke aprezenta mai iha Tribunal, maibe iha tiha desizaun haree katak, iha krimi balu aprezenta mai Tribunal laos akuza ho krimi Neglijente deit, maibe sei iha tan krimi balu junta hamutuk hodi akuza arguidu, ho nunee defeza halo rekuru.
Iha fatin ketak, Akademiku Rafael De Jesus dehan, kazu Zizelma hamosu preokupasaun iha sosiedade nia leet.
“Kazu nee hamosu preokupasaun iha sosiedade nia leet, tanba nee se husi parte vitima nian hakarak halo rekursu, dalan diak atu Tribunal bele deside fali, hodi labele hamosu preokupasaun iha sosiedade nia leet,” dehan nia.
Antes nee mos Jaime Do Rego Gonçalves, aman husi vitima deklara katak, sira buka justisa.
“Ami presiza justisa soke hau nia oan iha zebra kros Juiz la koalia dehan la sala, Juiz dehan la sala dezastre, motor soke hau nia oan uza plat seluk nian, falsifika dokumentus Juiz sira la tetu ida nee, “dehan nia.
(ter)
