DILI, STLTIMORLESTE.com – Relasiona ho komemorasaun Aniversáriu Forsa Armada Nasionál Indonézia (TNI) ba dala 80, Adidu Defesa Indonezia, Koronel (Arm) Hengky Sweeto Parsaoran servisu hamutuk ho KBRI Dili no empreza estatal no privada husi Indonezia iha TL realiza atividade servisu komunitaria hodi apoiu ai-haan bazika ba ema kbiit laek sira iha Parokia Santo Santiago Hera.
Atividade apoiu aihan bazika neebe halao iha Igreja Paroku Santo Santiago Hera, Domingu (19/10/2025), marka prezensa husi Enkarregadu ba Negósiu Interinu KBRI Dili, Nugroho, Xefe Komisaun Organizadora ba komemorasaun Aniversáriu Forsa Armada Nasionál Indonézia iha TL, Binsar Simangunsong, Amu Paroku Santo Santiago Hera, Antonius Ato, SVD, reprezentante husi Telkomcel, Banku BRI, Banku Mandiri, Sylvia Dili, Sister Motor Unipessoal, LDA no reprezentante Loja Lidwi no sarani katolika Parokia Santo Santiago Hera no marka prezensa mos ibu-ibu Dharma Wanita Persatuan KBRI Dili.
Ekipa sira husi KBRI Dili neebe lidera husi Enkarregadu ba Negósiu Interinu KBRI Dili, Nugroho no Adidu Defesa Indonezia iha KBRI Dili, Koronel (Arm) Hengky Sweeto Parsaoran, Adidu POLRI iha KBRI Dili, Komisariu Polisia, Kurniawan Hartono no reprezentante husi empreza estatal no privada sira simu direta husi Amu Paroku Santo Santiago Hera, Pe. Antonius Ato, SVD nomos tara tais no likurai husi komunidade sira.
Adidu Defesa Indonezia iha KBRI Dili, Koronel (Arm) Hengky Sweeto Parsaoran neebe reprezenta Embaixador Indonezia ba TL, Okto Dorinus Manik hato’o kumprimentus manas ba hotu-hotu neebe partisipa iha atividade nee no espera katak atividade nee lao ho diak iha ambitu domin nia laran.
Adidu defesa nee mos hato’o sentidu kondolénsia klean kona-ba familia matebian Domingas nuudar administradora Paroku Santo Santiago Hera nian neebe fila hikas ba Aman Maromak nia kadunan santu iha semana kotuk no família neebé husik hela hetan forsa fíziku no espirituál.
“Tuir lolos atividade ida nee ita halao iha semana kotuk, maibe tamba mosu dezastre ida iha Paroku Santo Santiago Hera nee, maka ohin foin ita halao. Hau sente impresionadu tebes ho benvindu neebé furak no ami mai ho sinseridade hodi fahe hamutuk nesesidade bazika nee,” katak Adidu Hengky.
Nia hatutan tan katak atividade servisu sosial nian nee, nuudar manifestasaun maun-alin no domin neebé realiza hodi komemora Aniversáriu Forsa Armada Nasionál Indonézia nian ba dala 80 no mos nuudar forma preokupasaun no amizade entre povu Indonesia ho TL.
“ Relasaun entre Indonézia no Timor-Leste harii iha kooperasaun mútua no espíritu umanidade. Tamba nee, hau hakarak hato’o hau-nia agradesimentu no apresiasaun klean ba asisténsia husi ita-nia maluk sira husi Telkomcel, Banku Mandiri, Pertamina Internasional Timor, Banku BRI, Sister Motor, Loja Lidwi, Sylvia Printing nomos komisaun tomak neebé servisu makaas no sira hotu neebé ajuda organiza eventu ida-nee.
“Espera buat neebe ita halo bele lori benefísiu ba irmaun-irmán sira, tanba ita hela iha nee iha ligasaun espirituál entre ita ho Igreja Santiago Santiago Hera,” nia haktuir.
Entretantu, Amu Paroku Santo Santiago Hera, Pe. Antonius Ato, SVD, hatete nia sente orgullu tebes ho atividade ida nee no hein katak atividade ida nee bele hametin liutan sentidu maun-alin, unidade, no kooperasaun entre nasaun rua.
“Atividade ida nee grasa boot tebes ba sarani sira neebe kbiit laek. Ema kbiit laek sira neebe halibur iha nee hamutuk 256, maibe balun la bele lao haruka sira nia oan mak mai simu. Sira kontenti, grasa boot, sira hatudu duni sira nia domin ba ami nia Parokia. Dala ida tan ami hato’o agradese ba sira nia domin liuhosi asaun sosial ida nee. Ami reza para sira nia saude diak no Maromak haraik grasa no rahun diak nunee sira bele halao sira nia servisu ho diak,” katak Amu Antonius.
Iha biban nee, Rafael Soares Ribeiro, reprezenta kbiit laek sira hato’o agradesementu ba KBRI Dili no Forsas Armadas Indonezia nian liuhosi nia Adidu Defesa iha KBRI Dili halao atividade sosial hodi apoiu aihan bazika ba ema kbiit laek sira iha Parokia Santo Santiago Hera.
“Obrigado ba KBRI Dili no Obrigado ba Forsa Armadas Indonezia nian neebe komemora aniversariu ba dala 80 neebe liuhosi nia Adidu Defesa iha KBRI Dili halo inisiativa hodi apoiu aihan bazika ba kbiit laek sira iha Parokia Santo Santiago Hera,” nia realsa.
Nunee mos Xefe Komisaun Organizadora husi GBI Rock, Binsa Simangunsong hatete nia sente kontente tanba komunidade husi Parokia Santo Santiago Hera simu sira ho diak no atividade sosial neebe realiza hodi komemora aniversariu Forsas Armadas Indonezia nian ba dala 80 lao ho diak.
Atividade apoiu aihan bazika nee remata ho foto hamutuk no fahe sasan ba labarik eskola oan sira hanesan, pasta no sel-seluk husi ibu-ibu Dharma Wanita Persatuan (DWP) KBRI Dili neebe lidera husi ibu Ratna Hengky Parsaoran.
Jornalista: Mikael Mali Mau
Editor: Mikael Mali Mau
