DILI, STLTIMORLESTE.com – Embaixada Republika Indonezia ka KBRI Dili hamutuk ho sidadaun Indonezia komemora loron Independensia Indonezia ba dala 80 (17 Agostu 1945-17 Agostu 2025) ho entuziasmu no kor nusantara neebe lori tema “Bersatu, Berdaulat, Rakyat Sejahtera, Indonesia Maju” (Unidu, Soberanu, Povu Prosperu, Indonezia Avansadu).
Selebrasaun aniversariu Independensia Indonezia ba dala 80 ho isar bandeira neebe lidera husi ekipa isar bandeira (Paskibra) kompostu husi joven feto no mane husi diaspra Indonezia realiza iha KBRI Dili, Dominggu (17/8/2025).
Tinan ida nee, prezensa sidadaun Indonezia sira hosi rejiaun oioin arkipelagu nian, inklui hatais tradisionál hosi Papua, Sumatra, Betawi, Bali, no Nusa Tenggara Timur (NTT), no mós batik javanes, neebe irradia espíritu diversidade nian.
Komandante iha serimonia isar bandeira nee mak Koronel Arm. Hengky Swee Pasoaran, atual Adidu Defesa Indonezia iha KBRI Dili.
Sidadaun Indonezia neebe partisipa iha serimonia nee ho sentimentu espiritu nasionalismu no hamanas liutan sira nia antusiasmu, bainhira koru nusantara neebe reprezenta komunidade Indonezia nian iha Timor Leste, hanesan Batak Diak Los (BDL), Flobamora, K3TL, Ibu-Ibu Santa Elisabeth, Maluku no sel-seluk aprezenta knananuk himne nasional neebe lidera husi dirijente knananuk nian husi Frater Ferdinandus Bau Tokan.
Embaixador Indonezia iha Timor-Leste, Okto Dorinus Manik, liuhusi nia diskursu hatoo ninia apresiasaun ba sidadaun Indonezia tomak neebe marka prezensa iha serimonia komemorasaun loron independensia Indonezia ba dala 80.
“Maluk sira, ita-nia kolega sira konsege marka prezensa ho hatais Indonezia nian neebe furak hanesan nee. Tinan ida-nee parese vibrante liután, emosionante, no estraordináriu liu tán.
Entaun, dala ida tan, hau-nia apresiasaun no agradesimentu klean ba ema hotu. Atu espíritu hamutuk, kooperasaun mútua, no unidade hamutuk nafatin ho ita,” hatete Embaixadór Okto Dorinus Manik.
Embaixador Okto Dorinus Manik mos hatete katak ninia prezensa iha serimonia komemorasaun loron independensia Indonezia ba dala 80 iha KBRI Dili nee ba dala ikus nian, tanba ninia misaun iha Timor Leste remata ona. Tanba nee, nia hatoo agradese wain ba ema hotu nia apoiu no kolaborasaun durante nia halao misaun diplomata iha Timor Leste.
Tuir nia, tema loron Independensia Indonezia ba dala 80 nee ligadu ho diskursu Estadu Prezidente Republika Indonezia, Prabowo Subianto ba Asembleia Konsulta Povu (MPR) iha loron rua liubá, neebe subliña importánsia atu alkansa soberania enerjia no ai-haan.
“Soberania alimentár, hanesan ita bele haree, tinan ida nee ita iha surplus foos tonelada millaun 4, no ida nee primeira vez ida nee akontese. Iha mós programa ai-han neebe hanaran ai-han nutritivu gratuitu. Ita implementa ona ida nee ba labarik millaun 20 no inan isin-rua sira. Ida nee laós deit atividade sosiál, maibe mós dalan ida atu prepara jerasaun osan-mean Indonezia nian,” hatete Embaixadór Okto Manik.
Tuir nia, Indonezia lao lalais liuhosi programa sira downstreaming industriál no kriasaun empregu nian, no estabelese ona instituisaun investimentu ida ho valór totál too biliaun US$ 1.
Nia subliña importánsia hosi papel diáspora indonezia nian, inklui sira neebe iha Timor-Leste, hodi apoia vizaun dezenvolvimentu nasionál.
Iha ámbitu relasaun bilateral nian, Indonezia kontinua hametin nia parseria ho Timor-Leste, liu-liu iha preparasaun ba adezaun tomak nasaun nian iha ASEAN iha fulan Outubru 2025.
Entretantu, sidadaun Indonezia, Fidelis Ase Olin hatete nia sente orgullu bele selebra loron independen Independensia ba dala 80 iha diaspora ho tema” Unidu, Soberanu, Povu Prosperu, Indonezia Avansadu.
“Espera katak ho Independensia Indonezia ba dala 80 nee, Indonezia sai unidu, belun no soberanu liutan no bem-estar ba nia povu diak liutan,” dehan Fidelis Olin.
Kona ba relasaun bilateral Indonezia-Timor Leste, Fidelis Ase Olin hatete, relasaun bilateral Indonezia-Timor Leste lao diak tebes, maski iha kestaun kiik sira, maibe la perturba relasaun diak entre nasaun rua nee.
“Hau nia haree katak kestaun no problema kiik sira neebe iha sei la hetan perturbasaun husi relasaun neebe iha,” nia tenik.
Iha sorin seluk, Madre Marseline husi Kongregasaun São Carlos Borromeo (CB) neebe halao nia knaar iha Timor Leste desde tinan 2007, dehan nia sente orgulhu bele selebra loron independensia Indonezia ba dala 80 iha KBRI Dili.
“Hau halao hau nia knaar nuudar madre husi kongregasaun CB iha Timor Leste dezde tinan 2007. Maske ambiente no karakterístika la hanesan, maibe haʼu koko atu adapta. Hau hanorin labarik sira iha Dili. Hau kontente no orgullu nuudar ema Indonezia hodi selebra loron Independensia Indonezia ba dala 80 no hein katak Indonezia sei kontinua progresu, unidade, no hetan dame. Indonezia ho Timor Leste mós sei avansa hamutuk,” katak Madre Marseline.
(mik)
