DILI, STLTIMORLESTE.com – Provedor Direitu Humanus no Justisa deklara katak, keixa neebe antes nee kadetes PNTL hatama ba iha PDHJ, ekipa halo hela investigasaun.
“Buat neebe parte PDHJ nian, tanba kadetes balu mai hatoo keixa ba iha PDHJ, no PDHJ rejista hanesan keixa, hodi halao nia investigasaun tuir mekanizmu PDHJ nian, no ekipa halo investigasaun hela,” dehan Provedor Virgilio da Silva Guterres ba jornalista sira iha Timor Plaza, Kuarta (18/03/2026)
Nia hatutan, sira simu keixa ida, neebe uluk portavoz ho nia kolega balu ba hatoo, PDHJ rejista, tanba nee ekipa daudaun kontinua halao hela investigasaun.
Hatan kona-ba komisaun neebe forma foin lalais nee, Provedor dehan ekipa PDHJ mos hola parte hotu.
“PDHJ mos hetan konvite husi Ministru Interior atu nomeia reprezentante iha laran investiga hela, hau seidauk bele pronunsia buat ida,” dehan nia.
Nia hatutan, ita hein Komisaun halao nia servisu, atu ikus mai Komisaun mak iha kompetensia atu koalia konaba prosesu indentifika.
Reforsa, Komisaun nia servisu maka atu halo avaliasaun ba prosesu hotu iha laran, atu ikus mai fo rekomendasaun dehan, anula parsial ka anula totalmente ida nee funsaun Governu neebe hamosu Komisaun nia servisu maka ida nee, tanba nee husik Komisaun halao nia servisu.
Afirma tan, antes nee sira nia rekomendasaun ba iha PN iha levantamentu anual nee atu anula, no rekomendasaun nee fo kontribuisaun ba desizaun Governu nian atu anula, suspende privizoriamente.
Maibe atu anula tebes ka lae, servisu komisaun mak sei deside.
Sublina, konaba prosesu iha Komisaun nia laran la pronunsia buat ida, rekomenda ba iha reprezentante PDHJ nian neebe envolve iha komisaun nee, atu defende maka prinsipiu sira neebe durante nee defende, no mos reforsa tan akordaun Tribunal Rekursu nian.
Informa ba iha reprezentante atu defende saida maka antes nee sira defende ona, atu prosesu nee garante buat sira nee la akontese, se mosu iha neeba kontra desizaun.
Iha fatin ketak, Akademiku UNTL, Rafael de Jesus dehan, presiza duni halo investigasaun hodi hatene lo-loos konaba prosesu nee.
“Hau hanoin PDHJ nia knaar importante tebes, tanba nee keixa neebe simu ona presija halo investigasaun, hodi hatene lolos,” dehan nia.
Informa tan, investigasaun husi PDHJ nian mos bele iha desizaun ida hodi konklui katak, keixa neebe hatama iha evidensia forte ka lae. Tanba nee tau konfiansa ba iha PDHJ hodi investiga.
(ter)
