DILI, STLTIMORLESTE.com – Relasiona ho informasaun neebe espalha kona-ba publiku balu kestiona rekrutamentu husi SEFOPE ba iha joven sira, Provedor Direitu Humanus no Justisa (PDHJ) seidauk hetan informasaun ruma husi parte relevante nian.
“Hau seidauk hetan informasaun ruma husi parte relevante PDHJ nian iha Diresaun Atendimentu Publiku kona-ba keixa nee, baibain keixa kuandu tama Diresaun Atendimentu Publiku halo relatoriu apresiasaun preliminar, depois mak lori ba komite jestaun keixa atu deskute,” dehan Provedor Direitus Humanus no Justisa, Virgilio da Silva Guterres ba Jornalista sira iha salaun Vila Verde, Segunda, (16/06/2025).
Nia hatutan, dala ruma keta tama ona karik, nia parte mak seidauk hetan informasaun, no hein katak se tama ona Provedor sei hatene, tanba sei tama iha komite jestaun de keixa.
Hatan kona-ba pedidu Provedor sira nian ba Tribunal Rekursu kona-ba atu husu halo fikalizasaun abstrata kona-ba nomeasaun Prezidente Tribunal Rekursu, Provedor dehan sei iha hela faze analiza.
“Ba iha Tribunal Rekursu ami sei halo analiza, no ami seidauk hatama pedidu tanba sei iha nivel analiza hela,” dehan nia.
Iha sorin seluk, Akademiku UNTL, Rafael de Jesus dehan, Provedor mos iha kompetensia hodi haree kona-ba ema neebe halo violasaun ba direitus umanus no mos abuzu poder, se ema ruma sente hasoru aktu nee bele hatoo keixa.
“Provedor iha hodi rona preokupasaun sira neebe publiku hasoru, se sente iha buat ruma la los iha Instituisaun bele hatoo ba iha Provedor, hodi haree kona-ba situasaun nee,” dehan nia.
Reforsa tan, atu halo rekrutamentu tenke tuir baze legal neebe iha, labele hamosu preokupasaun iha publiku nia leet, tanba ema hotu tenke hakruk ba regra sira neebe estabelese.
(ter)
