BAUKAU, STLTIMORLESTE.com – Autoridade Suku Afasa, Postu Administrativu Kelikai Antigu, Munisipiu Baukau, husu Governu liu husi Ministeriu Interior atu estabelese Edifisiu Polisia Eskuadra.
Entretantu Suku Afasa inklui ho suku 4 seluk hanesan Namanei, Gurusa, Waitame no Abafala sai Postu Administrativu ketak, liu husi dezisaun final iha Sorumutuk Konselhu Ministru iha loron 15 Marsu 2023.
Nunee iha loron 12 Dezembru 2024, Governu liu husi Ministeriu Administrasaun Estatal nomeia ona Administrador Postu hodi Administra Postu Kelikai Antiga tuir dekretu lei nu. 34 ho diploma Ministerial neebe regula funsionamentu tutela ba Autoridade Munisipal.
Tanba nee, iha fulan Janeiru 2025 Autoridade Suku sira entrega ona rai medida luan no naruk metru 100² ba Komando Polisia Munisipiu Baukau hodi relata ba Komando Jeral Polisia Nasional Timor Leste atu konstrui edifisiu Polisia Eskuadra hodi atende nesesidade seguransa no seluk tan.
“Hau husu ba Komandante jeral PNTL, liu-liu Ministeriu Interior para lalais tau orsamentu ba konstrusaun, para bele destaka Komadante atu asina Bom Komportamentu ba nesesidade joven nian,” hatete Xefe Suku Afasa, Joaquim Fernandes Ximenes ba jornalista sira iha Kelikai Antiga, Kuarta (05/02/2025).
Nia sublina, rai neebe Autoridade Suku sira entrega ba Komando Polisia Munisipiu Baukau ho status Rai Estadu, nunee aselera prosesu konstrusaun hodi destaka Komando Polisia Eskuadra bele atende joven sira nia nesesidade, liu-liu ba tratamentu bom komportamentu nian, tanba daudaun joven sira neebe trata bom komportamentu seidauk hetan asinatura husi komadante Eskuadra, tanba seidauk iha.
Tanba rai medida neebe entrega ba Komando Munisipal iha fulan Janeiru tinan 2025, neebe ofisialmente ekipa tekniku husi Terras no Propriedade hamutuk ho ekipa Komando Munisipal halo ona levantamentu dadus, bele konstrui edifisiu kompleta ho kajerna ba Komadante no membru destakadu sira, tanba rai luan.
Enkuantu Komandante Komando Polisia Interinu Munisipiu Baukau, Superintendente Joao Sancho Pires deklara, estabelesimentu Postu Administrativu foun 2 iha Munisipiu Baukau, hanesan Kelikai Antiga no Postu Matebian, Komando Polisia Munisipiu Baukau halo ona levantamentu dadus ho medida hanesan iha kada postu, neebe relata ona ba Komando Jeral PNTL no tuir planu sei aprezenta ba Ministeriu Interior hodi foti desizaun.
“Ita hasae ona, depende halo konstrusaun kajerna diak liu, tanba ita preve hela rai 100X100 metrus, neebe ita hasae ona ba Ministeriu halo hela edifisiu ba Eskuadra foun 2 nee,” hatete Joao Pires.
Tuir Komadante Munisipiu nee katak, estabelesimentu edifisiu foun ba Polisia Eskuadra iha postu foun 2 refere importante hodi atende asuntu seguransa no seluk tan.
Entretantu bainhira estabelese ona edifisiu Polisia Eskuadra iha Postu Kelikai Antiga, sei kobre seguransa ba area 80km², iha suku 5 hanesan Afasa, Abafala, Gurusa, Namanei no Uaitame ho total populasaun 5.998.
(EST 2)
