BAUKAU, STLTIMORLESTE.com – Kestaun profesores nain 1 deit hanorin estudante sira iha Eskola Publiku Ensinu Baziku Filial (EBF) Alaua Kraik, iha Postu Administrativu Baguia, Servisu Edukasaun Munisipiu Baukau sei haree asuntu nee.
Diretor Servisu Edukasaun Munisipiu Baukau, Afonso dos Santos da Costa katak, kada eskola ensinu baziku sira iha Munisipiu Baukau neebe kontinua menus profesores, Diretor Eskola sira iha sentral mak tenke halo jestaun hodi koloka profesores sira ba Eskola Filial neebe menus profesores, tanba iha regras kuadru pesoal hateten ona, kada profesores semana ida hanorin oras 24, maibe eskola EBF Alaua Kraik sei menus profesores, tanba iha deit profesores nain 1 hanorin estudante sira, kauza mos Diretor Eskola iha sentral la koloka profesores hodi apoiu.
“Tuir informasaun neebe ita iha, profesores barak iha klase paralelu, mais informasaun foin fo hatene eskola ida iha Alaua Kraik primeiru siklu profesor naim 1 deit, pois hau husu,” hateten Afonso ba STL iha nia knaar fatin Vila Nova, Baukau, Kuarta nee (02/04/2025).
Nia hateten, daudaun profesores barak hanorin iha klase paralelu neebe iha Postu Baguia, tanba nee sei koordena ho Diretor Eskola Sentral hodi koloka profesores hodi apoiu, maibe la apoiu nee sei difikulta ba estudante sira iha prosesu ezame, tanba bele falta materia balun.
Nia sublina, bainhira haree profesores iha Baguia la sufisiente atu koloka ba Eskola EBF Alaua Kraik, Edukasaun Munisipal sei koordena ho eskola sentral sira seluk neebe iha profesores sira sufisiente hodi apoiu.
“Ita haree bele apoiu ba iha neeba (EBF Alaua Kraik), ezemplu iha terseiru siklu profesores ida nia tempu free barak liu oras hanorin oituan menus husi 24 por semana, nee bele ba apoiu fali eskola seluk hodi kompleta 24 oras por semana,” hateten Afonso.
Nia rekomenda, profesores Eskola Ensinu Baziku Sentral sira iha Postu Baguia no seluk neebe vizinhu ho Postu Baguia tenke halo equilibre hodi koloka profesores ba Eskola Filial sira neebe menus.
Tanba durante nee profesores barak la prienxe oras hanorin oras 24 kada semana, nunee Edukasaun Munisipal sei koordena hodi responde preokupasaun iha eskola Alaua Kraik.
Entretantu Eskola Alaua Kraik estudante hamutuk nain 66 kompostu primeiru too kuartu anu ho profesores permanente nain 1.
(tom)
