DILI, STLTIMORLESTE.com – Bankada Partidu KHUNTO husu ba Sekretariu Estadu ba Asuntu Toponimia no Organizasaun Urbana (SEATOU), Germano Santa Brites Dias atu halo dialogu ho komunidade sira iha Bekora, hodi buka solusaun no labele sobu komunidade sira nia uma, tanba rai nee populasaun sira nian.
Deputadu Bankada KHUNTO, Luis Roberto hateten, prosesu alargamentu estrada husi Kuluhun ba too iha Bekora neebe afeta ba propriedade privada husi komunidade sira nian.
Tuir nia, markasaun primeiru nee komunidade sira koopera ona ho governu hodi kontribui 3 metru, maibe segundu markasaun hodi alarga tan metru 3 nee mosu dezentendimentu, tanba SEATOU ho ekipa ba halo markasaun la liu husi dialogu ruma.
Tanba nee nia husu ba SEATOU ho ekipa atu promove dialogu ho komunidade sira, tanba maoria rai neebe iha rai privadu, laos estadu nia, hodi evita mosu problema neebe ema hotu la hanoin atu akontese.
“Maibe hanesan reprezentante povu hakarak husu nafatin ba Governu tenke halo dialogu ho ita nia komunidade sira neebe rai privadu iha Bekora nee, nunee sira mos bele simu, ita labele uza deit ita nia arogante, ita nia forsa hodi hamate tiha ita nia komunidade sira nia hanoin,” hatete Deputadu Luis Roberto iha Parlamentu Nasional liu husi plenaria, Tersa nee (08/04/2025).
Nia hatutan, se governu sobu obrigatoriu populasaun Bekora nia uma la liu husi dialogu ruma mak sei hamosu dezentendimentu no hamosu problema neebe ema hotu lakohi hakarak atu mosu.
Tanba nee nia husu ba governu atu servisu koordenasaun liu husi ekipa neebe mak iha, laos ida ekipa primeiru tun sukat tiha la kleur ekipa segundu tun ba sukat tan, signfika ekipa konjunta neebe governu iha servisu la iha linha koordenasaun.
“Hau fo ezemplu markasaun primeiru nee populasaun sira kontribui 3 metrus, depois ekipa segundu tun fali ba marka tan, komunidade sira mos la hatene tan katak aumenta tan 3 metrus, ida nee hatudu katak mal administrasaun, ekipa integradu neebe iha nee la servisu hamutuk, entaun presiza hadia kestaun ida nee,” dehan nia.
(alb)
