DILI, STLTIMORLESTE.com – Bankada Partidu KHUNTO iha Parlamentu Nasional (PN) sujere ba governu atu taka permanente atividade Grupu Arte Marsiais no Grupu Arte Rituais iha Timor Leste, tanba governu hasai ona rezolusaun atu suspende, maibe Grupu Arte Marsiais kontinua treinu subar.
Kestaun nee Deputadu Luis Roberto, wainhira Parlamentu Nasional (PN) ho Governu diskuti hela orsamentu 2025 neebe aloka ba Ministeriu Juventude Desportu Arte no Kultura (MJDAK).
“Governu presiza hatur lo-loos pozisaun atividade Grupu Arte Marsiais no Grupu Arte Rituais tuir nia dalan, se governu haree ladun fo efeitu neebe diak karik diak liu taka tia deit, tanba suspende mos hanesan deit, Grupu balun kontinua halo atividade hela tanba balu kumpri balu la kumpri,” hatete Deputadu Luis Roberto iha ambitu debate OJE 2025, iha faze espesialidade, iha PN, Segunda (18/11/2024).
Nia hatutan, governu presiza halo esklaresimentu lo-loos ba rezolusaun neebe governu hasai ona hodi suspende atividade Grupu Arte Marsiais no Grupu Arte Rituais, tanba durante nee taka hela mos iha Grupu balun kontinua halo atividade.
“Hakarak husu pedidu esklaresimentu kona-ba atividade Grupu Arte Marsiais neebe durante nee governu suspende ona bazeia rezolusaun governu numeru 46 atu suspende atividade Grupu Arte Marsias no Grupu Arte Rituais iha Timor Leste,” realsa nia.
Iha fatin hanesan, Deputadu Bankada FRETILIN, Antoninho Doutel Sarmento kestiona Ministeriu Juventude Desportu Arte no Kultura (MJDAK), tanba suspende ona atividade Grupu Arte Marsiais no Grupu Arte Rituais sira, maibe sei aloka nafatin orsamentu ba Komisaun Reguladora Arte Marsiais.
Hatan ba ida nee, Ministru Juventude Desportu Arte no Kultura (MJDAK), Nelyo Isac katak, governu hasai ona rezolusaun governu atu suspende atividade provizoriu atividade Grupu Arte Marsiais no Grupu Arte Rituais, laos taka permanente.
“Dehan governu suspende ona nee sei taka total nee lalos, governu suspende ona maibe iha rezolusaun governu husu nafatin Komisaun Reguladora Arte Marsiais atu halo nafatin akompanhamentu ba GAM-GAR, karik iha buat balun neebe la diak karik, husu nafatin sira hadia aan nunee wainhira suspensaun nee hotu ona mak ita bele orienta ona ba atividade desportu,” hatan Nelyo Isac.
Entretantu iha biban nee, Parlamentu Nasional (PN) aprova ona orsamentu ba Ministeriu Juventude Desportu Arte no Kultura (MJDAK) hamutuk US$ 9.472.726 iha faze espesialidade ho votu afavor 42, kontra 19 no abstensaun 3.
Tuir proposta OJE 2025, orsamentu neebe aloka ba Ministeriu Juventude Desportu no Arte Kultura hamutuk US$ 9.472.726, husi orsamentu nee aloka salariu vensimentu US$ 2.729.571, Bens Servisu US$ 1.850.047, transferensia publika US$ 4.261.650, kapital menor la iha no kapital dezenvolvimentu US$ 631.458.
(alb)
