LIKISA, STLTIMORLESTE.com – Konselhu Imprensa (KI) formaliza ka fo formasaun ba jornalista nain 29 iha Munisipiu Likisa, ho objetivu atu orienta diak ba jornalista sira hodi halao servisu ho kredivel no akutavel.
“Ita haree formasaun nee importante tebes ba jornalista Timoroan hotu, oinsa bele halao atividade mundu jornalizmu nian ho dignu, oinsa bele kontinua halao servisu ho profisionalidade ba informasaun sosiedade nian ba publiku hodi kompreende ho diak,” dehan Prezidente KI, Otelio Ote liu husi nia diskursu iha Likisa, Segunda (09/12/2024).
Tuir Prezidente KI nee, jornalista servisu tenke tuir matadalan mundu jornalizmu neebe iha, katak rekolha informasain tuir kode etika neebe iha, presiza lori informasaun neebe atuais, faktuais, nunee ema hotu bele hatene situasaun ka kondisaun ruma neebe akontese iha rai laran.
Tanba planu KI fo formasaun ba jornalista sira, liu-liu programa jornalizmu ambiental, atu hatene no kompreende kondisaun hotu-hotu, nunee bele transmite informasaun neebe sai kondisionalidade ba publiku.
“Ita husu ba jornalista hotu-hotu atu aprende no kompreende diak ba oportunidade neebe iha, tenke halao servisu nuudar profisionalizmu, tenke buka hatene informasaun neebe lo-loos no kredivel, hodi afirma ba publiku ho informasaun transparente,” nia hateten.
Entretantu formador husi Indonezia, Untung Widyanto dehan, notisia mak produtu jornalista ida nian, neebe iha tipu rua husi notisia ka reportajen, notisia direta ka badak straight news ka hard news no notisia klean naruk investigativu softnews ka feature, husi informasaun hirak nee jornalista presiza elabora ho diak, nunee publiku bele entende ho diak.
Tanba karateristika prinsipal husi notisia direita mak baibain uza liafuan sira neebe direita, no informasaun nee jornalista sira bainhira hakerek ona liu husi maneira atu oinsa hakerek badak deit, maibe ho informasaun solidu, bazeia ba kondisaun neebe iha no la inklui opiniaun jornalista nian.
Tuir jornalista husi Radio Komoro, Florentina Bianco hatete, agradese ba programa KI neebe fo formasaun ba jornalista sira, ho tema Jornalizmu Ambiental, nee objetivu ida atu haklean liu tan esperiensia jornalista nian, oinsa bele halo informasaun neebe sai diak liu tan, liu-liu profisionaliza aan nuudar jornalista Independente iha TL.
Tanba ideia ka hanoin atu hakerek notisia ka halo informasaun nee bele mai husi kualker fatin ka tempu, nunee konsidera interesante liu, hafoin mak tutan hamutuk hodi sai angulu ida neebe halo fasil ba jornalista iha prosesu atu aranja ideia nee.
(EST 1)
