DILI, STLTIMORLESTE.com – Membru Konselhu Imprensa (KI) husu Prezidente Republika (PR), Jose Ramos Horta atu kondekora jornalista sira neebe mate iha funu laran, tanba defende lia loos.
Kestaun nee hatoo husi Prezidente Konselhu Imprensa (KI), Antonio M.da C. Moniz Mali ba jornalista sira, iha palasiu Prezidensial Nicolau Lobato, Bairru Pite, Dili, Segunda (22/09/2025) hatete, ohin marka audensia ho Prezidente Republika relata asuntu tolu, asuntu ida mak kona-ba mai aprezenta membru KI ba Prezidente ba mandatu datolu neebe sira simu iha fulan kotuk, no asuntu segundu mak konvida Prezidente Republika atu partisipa tinan 50 komemorasaun Balibo five, terseiru konvida Prezidente fo kondekorasaun ba jornalista neebe mate tanba kobertura iha luta indepedensia.
“Liu-liu jornalista nain 5 husi Australia neebe mate iha Balibo, ita aproveita tinan 50 Balibo Five nia, ami mos husu ba Prezidente Republika atu fo kondekorasaun ba jornalista nain 5 neebe mate iha Balibo, nomos jornalista sira seluk neebe mate iha fatin sira seluk, hanesan ita hotu hatene iha Dili mos jornalista nain rua ka tolu mate,” dehan Prezidente KI, Antonio Moniz Mali.
Nia hatete, iha hasoru malu sira mos aprenzenta naran jornalista nain 9, ba Prezidente Republika hodi fo konkodekorasaun.
“Total jornalista neebe ami propoin ba Prezidente Republika, atu halo rekonhesimentu ofisial ka fo kondekorasaun hamutuk nain 9,” dehan nia.
Nunee mos Doretor Ezekutivu Konselhu Imprensa, Antonio Dias hatete, Balibo Five tinan ida nee konhesidu ho tinan 50 ka masakre ba jornalista nain 5 neebe sakrifika sira nia vi da ba lia loos.
“Hanesan ita boot sira hatene iha dia 16 nee halo advokasia no foti loron 16 Outubru husi kolega sira jornalista sira nia mate sai tiha loron nasional Liberdade emprensa, no tinan ida nee ita komemora, terseiru aniversariu loron nasional liberdade imprensa I 50 anos komemorasaun trazedia Balibo ho tema central Liberdade imprensa ba lialos no justisa, komemorasaun tinan 50 trazedia Balibo,” dehan nia.
Entretantu Prezidente Republika (PR), Jose Ramos Horta konfirma katak, sei prepara hela kondisaun legal sira nunee iha loron 16 fulan Outubru, bele realiza rekoinesementu ofisial ka kondekorasaun ba jornalista sira neebe aprezenta husi Konselhu Imprensa.
Aleinde nee Prezidente Republika hatete, nia sei hola parte iha atividade iha loaon 16 fulan Outubru neebe organiza husi Konselhu Imprensa.
Jornalista: Emerenciana Pinto
Editora: Carme Ximenes
